amalinks wokungena

Breaking News

Owesifazana weMutare Uyekethiselwa Kusigwebo Sokulengiswa


Amagqwetha kanye labalwela amalungelo oluntu bathi ukususwa kwesigwebo sogodo kowesifazana weMutare kutshengisa ukuthi isisekelo sombuso silakho ukuguqula impilo zabantu njalo sisetshenziswe ukuvikela amalungelo oluntu nxa silandelwa ngendlela.

Owesifazana lo obeseqede iminyaka emihlanu emelele ukuthi kuqhutshwe lesi sigwebo ubekhweze udaba lwakhe emthethwandaba wesisekelo sombuso, iConstitutional Court, ephathiswa yinhlanganiso yamagqwetha iZimbabwe Women Lawyers of Zimbabwe, ukuthi lesi sigwebo asisekho emthethweni.

Isisekelo esitsha sombuso siyenqabela ukugwetshelwa ugodo kwabesifazana kanye labesilisa abasakhulayo abaleminyaka engaphansi kwamatshumi amabili lanye kanye lasebekhulile phezu kwamatshumi ayisithupha lanhlanu.

Igqwetha, uNkosazana Maureen Mudehwe, uthi kuhle ukuthi isisekelo sombuso siqalise ukusetshenziswa, sihanjiswa emthethwandaba lo ukuze izahluko ezingekho emthethweni zesulwe uzulu aqale ukusithakazelela lapho siguqula impilo zabo.

Isigwebo sogodo, uthi akumelanga sibekhona vele ngalezinsuku zalamhla ngoba amalungelo oluntu kawavumelani laso.

Olwela amalungelo oluntu, uNkosikazi Rita Mukuyu, uthi ukukhitshwa kowesifazana kusigwebo lesi siguqulwa ukuthi ahlale entolongweni impilo yakhe yonke, linyathelo elihle kodwa kumele engabikhona vele umuntu ogwetshelwa ugodo kungakhathalekile ukuthi ngowesilisa kumbe owesifazana.

UMnumzana Lizwe Jamela oligqwetha kunhlanganiso yeZimbabwe Lawyers for Human Rights, uthi kuqakathekile ukuthi kungakakhangelwa isisekelo sombuso lesi kuhlolisiswe njalo ukuthi abantu bayenelisa na ukufinyelela umthetho bawusebenzise ukuzivikela njengalokhu. Imithetho edinga ukuguqulwa, uthi ilula ukusetshenziswa, kungakho kumele kuqakathekiswe le edinga ukubekwa kutsha.

Uqhubeke esithi kunengi okuguqulwe yisisekelo sombuso okungasekho emthethweni okumele uzulu ahlale eqaphele ukuthi akusetshenziswa zinhlangothi zikahulumende ezitshiyeneyo.

Sokuyiminyaka emibili lokhu kwabekwa isisekelo esitsha sombuso kodwa inengi lemithetho edinga ukuguqulwa ilokhu ihlezi injalo. Kulemithetho engaphezu kwamakhulu amane - 400, edinga ukuguqulwa egoqela eyabantwana, eyokuhanjiswa kwembiko kanye lokunye okunjalonjalo.

XS
SM
MD
LG