Umthunywa oqakathekileyo wenhlanganiso yomanyano wamazwe womhlaba eyeUnited Nations ebona ngezamalungelo oluntu, uMnu Clement Voule, ngoLwesine uhlangene lomlawuli wedale lePhalamende uMnu. Jacob Mudenda kanye labakhokhela amakomiti ehlukeneyo aleli dale.
Umnumzana Clement Voule ufike ngoMvulo kuhambo lokwethekelela okwensuku ezilitshumi ngenhloso yokuzohlolisisa umumo ophathelane lokulondolozwa kwamalungelo oluntu.
Lolu hambo ulwenza ngesikhathi eZimbabwe sekuvame izehlakalo zokuthunjwa, ukubotshwa lokutshaywa kwabantu ikakhulu labo abachothoza uhulumende.
Lanxa uVoule engasakhulumanga lentathelizindaba nemva kwalumhlangano uMudenda uthi bamcasisele ukuba uhulumende usebenza okumgceke okuyikho okumenze bamnxuse lequla lakhe ukuzozibonela.
“Sibe silomhlangano omunhle lommeli we UN sikhangele inguquko kwe zama election. Lokuthi inotho yelizwe singayithuthukisa njani.”
UMudenda uqhubeke ethi uhulumende uphakathi kokuguqula imithetho ukuze ibe ngekhanga abakwamanye amazwe ukuzotshala imali elizweni.
“Sizaqeda umthetho womnotho ukuze abafuna ukusivakatshela be ngenza njani ukuthi baguqule ilizwe”
Umnumzana Voule ukhangelelwe ukuhlangana labenhlangothi ezitshiyeneyo zempilo kuphenyo olukhangela ukuqonga kwezehlakalo zokuthunjwa kwabantu elizweni.
Isiphathamandla senhlanganiso ezilwela amalungelo oluntu lezokholo uMfundisi Anglistone Sibanda uthi uVoule kumele akhulumisane lenhlangothi zamacele wonke hatshi icele elilodwa.
“Kuyinto enhle kakhulu ukuthi iUnited Nations ibone kuqakathekile ukuthi ithumele isthunywa sayo ukuthi sizohlolisisa, sicubungule, sicwayisise ukuze kwazakale ukuthi kuliqiniso yini kumbe ngamanga ukuthi amalungelo oluntu ayancindezelwa, abant bayahlukuluzwa so sikhangelele ukuthi iqiniso lizaphuma. Ngibona abanengi bethu bayajabulela iZimbabwe ukuthi ilokhu isaziwa kulilizwe elilokuxuku, abajabulela ukuthi kube lama sanctions eZimbabwe, abajabulela ukuthi abantu bahlupheke ngoba bona bafuna ukuthi babuse ngandlela zonke.
“Besicela ukuthi umthunywa lo angakhulumi labantu bohlangothi olulodwa kodwa akhulume labantu bonke, azwe imbono etshiyeneyo ngoba kulembuzo eminengi ngokunyamalala kwabantu okukhona, kulokungathi akucaci kahle so sikhangelele ukuthi iqiniso lizaphuma ukuze iUnited Nations yazi iqiniso hatshi ukuthi ilandele inhloso zalabo abajonge ukungcolisa ilizwe leZimbabwe. Kumele kucace ukuthi ngubanti.”
Unobhala jikelele wogatsha lwabatsha kubandla le MDC umnumzana Ostallos Siziba uthi uVoule kumele aqaphele akutshelwa nguhulumende ngokuthunjwa kwabantu.
“Ngokubona kwami into eqakathekileyo yikuthi umthunywa weUN kufanele akhangele ikakhulu udaba lokutshengisela kodwa ke okuqakathekileyo yikuthi kukhangelwe ukuthi kuqeda kutshengisela akhona yini amalungelo abantu abayabe betshengisela.
“Ngenxa yokuthi abantu bengatshengisela bayalandelwa ezindlini, yiyo into ehluphileyo eZimbabwe njengoba sibona udokotela ongabonakaliyo kuze kube namuhla, kulabanye abathunjwayo oBustop, kufanele enanzelele ukuthi uhulumende ukukhuluma kwakhe ukuthi abasoze bevumele ukutshengisela.”
Ukwethekelela kukaVoule elizweni kwenziwa ngesikhathi odokotela bekhalala umsebenzi njalo bekhonona phezu kokunyamalala komunye wabo uDr Peter Magombeyi onakanelwa ukuba uthunjiwe ngempelaviki.
Uhulumende uthi ukhathazekile ngokunyamalala kukaMagombeyi. Izolo umpathintambo wezobudlelwano lamanye amazwe womhlaba uMnu. Sibusiso Moyo utshele intathelizindaba ukuthi uMagombeyi angabe ethunjwe ngabantu abahlose ukungcolisa uhulumende kaMongameli Emmerson Mnangagwa.
