Iyenza ezibukwayo kwezomceco wabatsha insizwa edabuka eZimbabwe uMakhosi Tshuma kweleSouth Africa. UTshuma othethe isikhathi eside esiwa evuka, uselolwakhe uhlobo lwempahla alubiza ‘Ezasekasi’.
UMakhosi Tshuma uthi angahlanganisa inalithi, uhali amazinyo omtshina lelembu kuphuma umceco okhwabithwa yintsha yesabe khona lokunyathela phansi.
Linsizwa eleminyaka engamatshumi amathathu lane (34) yokuzalwa, ithi ikhule isidla imbuya ngoluthi. Ezokuthunga zona zahle zaba sekhanda esaseZimbabwe kwathi ngo 1999 waqala ukuhlela ukuthi uzazenza njani.
Uthi wayekwazike ukuthi la ngamaphupho kaThemba lo Amkela kwazise wayengelangitsho yona elesikhala yokuthenga isikopela.
“Ngilebrand iKasi Swagg leZasekasi brands. Ngamabrand ayi 2 ahlangane aqale ngo 1999. Aqale esephepheni then ma ngifika la eSouth Africa 2005 then yikho engiqale khona ukuthi ngiprojuce indwangu ngiyenze igarment ngikwazi ukuyigqoka lokuyidayisa. Ibrand yami ikhavarisha from umntwana ona 1 year isiyagcina kumuntu ona 75 years.”
Amagama empahla zakhela, kawasiwo wokuzibumbela kodwa alomutsho.
“And eZasekasi yona ibrand it means umuntu okhulele elokitshini. Ngoba abantu bathanda ukugqoka ama Nike, ama Adidas amabrand abangawazi ukuthi abuyaphi so mina ngiye ngacreator ibrand ezothandwa ngabantu esuka elokitshini ekasi ngiyinikeza abantu abahlala ekasi.”
Ngesikhathi abanye befika egoli belahla amaphupho abo abanye besiba ngomantshingelani abanye besiyasebenza emakhitshi, abanye bekhetha ukubambinkunzi, uTshuma yena kazange alilahle iphupho lakhe.
“Ma sengiqathanisa lalapho engikhona manje kulomahluko omkhulu kakhulu. Ngiyazi ukuthi lento engiyidingayo ngiyithole. Lala esengihlala khona sengihlala endaweni engathi ingcono kulakuqala ngoba bengi shera ngekhethenisi ngapha ngishera ne Ofisi. Ngapha yonke into ifuna mina nasekhaya kudinga mina. Compared with okwamanje I think everything is coming up alright.”
Ibhizimusi likaTshuma leli selileminyaka emithathu. Okwakhathesi uselezisebenzi ezinhlanu, ababili abathungayo labathathu abakhangisa leli bhizimusi emalokitshini. UKwanele Moyo ngomunye wabathunga Ezasekasi.
“Mina ngikubona kuyinto enhle ukuthi wazi umsebenzi wezandla into efana nokuthunga. Ma uyenza like impahla kumele ukhonsentrete kuyo. Ngisuka ngibe nephepha ngiqale ngidizayine. Besengibona ukuthi into engiyidizayinileyo iyakwazi ukwenza lento engiyifunayo.”
Kantike uNokuthula Ngwane ngomunye wabawuthanda kakhulu umceco weKasi Swagg leZasekasi.
“Ezasekasi brand yi brand engiyithanda kakhulu. Impahla zakhona zicomfortable. Impahla zakhona ziyathengeka. So lawe ngilandela hambuyothenga something for yourself sihambe sonke eKasi sibe right.”
Ayikho into angayithungiyo uTshuma. Uthunga ezomtsheno, amahovarosi, ezemidlalo, ezamaqembu aculayo, ezabomama labobaba kanye lezemitshado.
“Elakusasa lami, isifiso sami besingesokuthi la overseas abantu bakwazi ukuyigqoka njengobana lapha e Africa sikwazi ukugqoka I Adidas labo Nike ababuya overseas, why can’t bona begqoke laleyi edizayinwe ngumuntu omnyama? Lokuthi ngikwazi ukungena emashop, nxa umuntu engena kubo Edgars engena kubo Woolworths akwazi ukungithola lami ngikhona. Ngikhompithe labo adidas.”
Yenake uthi ezakhe zilophawu lwenyawo lwenja kanye lethenisi lohlobo lwe Allstar. Uthike likhulu ithemba lokuthi leli bhizimusi lizathuthuka kakhulu ngoba eselekheli lebulenjini (I website) lekhasi lefacebook lapho abanengi ababona khona umsebenzi wakhe kungakhathalekile ukuthi bakuphi komhlaba.
