amalinks wokungena

Breaking News

Iyaqala ICongress YeMDC KaTsvangirai KoBulawayo


Umkhokheli welinye lamacele eMDC uMnu Morgan Tsvangirai uvule umhlangano omkhulu webandla lakhe oweCongress koBulawayo ngoLwesine ekhuthaza abasekeli bakhe ukuthi batshiyane lodlakela njalo belungiselele ukhetho, lona athe luzakwenziwa ngomnyaka ozayo.

"Ukhetho oluzayo luzakwenziwa ngemva komnyaka, ngakho kumele lihlale lilindele. Kusobala ukuba sizayinqoba iZanu PF singene sibe nguhulumende weZimbabwe," kuthembise uTsvangirai.

UMnu Tsvangirai uthe njalo ibandla lakhe selinqume ukuxotsha bonke abatholakale bebangela udlakela oluqhamuke ezigabeni zalelibandla endaweni ezitshiyeneyo kusikhatshana esedluleyo, ikakhulu koBulawayo amalunga ebanga izikhundla.

Ukhetho lokudinga ikhokheli yalelibandla entsha luzaqhutshwa ekugqitshweni komhlangano lo ngoMgqibelo. Abangasoze bancintiswe kuzikhundla zabo nguMnu Tsvangirai loMnu Roy Bennet, yena ongumgciningcebo walelibandla.

Umhlangano lo uzaqhutshelwa enkundleni yeBarbourfields njalo inhloko kahulumende weleKenya uMnu Raila Odinga unxusiwe ukuba ngumhlonitshwa. Ubikwa ezakhuluma emhlanganweni lo ngoLwesihlanu.

Ingcwethi ezicubungula ezombusaze uMnu Effie Dlela Ncube loMnu Rejoice Ngwenya bathi kuyadanisa ukuba udlakela lukhanya soluyinsakavukela umchilo wezidwaba kuMDC kaTsvangirai.

Kusenjalo, ikomiti yedale lephalamende ebona ngokulotshwa kutsha kwesisekelo sombuso eye COPAC, ithi umsebenzi wayo usubuyiselwe emuva ngumhlangano we Congress yecele le MDC elikhokhelwa nguMnu. Morgan Tsvangirai kanye lamakhefu abekhona kulinyanga, ngakho ukhetho lwe referendum aluseyikuqhutshwa ekupheleni kwenyanga ka Mpandula.

UMnu. Believe Gaule, umsekeli kamgcinisihlalo we COPAC uthi inhlanganiso le isizaqhuba umsebenzi wayo ekuqaleni kwenyanga ezayo sokwedlule ikhefu lokunanza ilanga lezisebenzi i May Day, njalo ukhetho lwereferendum lungenziwa ngenyanga ka Mfumfu.

UGaule utshele uSithandekile Mhlanga weStudio 7 ukuthi i COPAC ayigconi abanye ngokudonsela emuva loluhlelo.

XS
SM
MD
LG