Ubungqayingqayi buyaqhubeka kuMDC-T ezinye izicukuthwane zalelibandla zisithi azibamukeli ubukhokheli bukaMnu Nelson Chamisa yena obanjiswe intambo nguMnu Morgan Tsvangirai.
UMnu Elias Mudzuri nguye obephethe lesi sikhundla ngemva kokukhethwa nguTsvangirai kumaviki ambalwa edluleyo yena esesiya kweleSouth Africa lapho elatshwa khona umkhuhlane wemvukuzane.
Abazi ngokwenzakalayo bathi uMudzuri umangele esizwa ukuthi uChamisa nguye oseziphethe. UNkosazana Thokozani Khupe laye uthukuthele.
UMudzuri loMakhupe babikwa bekweleSouth Africa ngenjongo engazakaliyo.
Kunakanelwa ukuthi ababili laba bengaba beqoqa ukulwisana loChamisa bebambene. Kodwa okwaziwayo yikuthi bayafunga bathi kabasoze bakhokhelwe nguChamisa.
Kodwa umsekeli wesikhulumeli seMDC-T uNkosazana Thabitha Khumalo uthi labo abazama ukugwenxa uChamisa bayazikhohlisa.
Ingcwethi kwezombusazwe uDr. Nkululeko Sibanda uthi ukulwisana phakathi kwenkokheli yeMDC-T kufaka lelibandla engozini enkulu.