amalinks wokungena

Breaking News

Iyifuna Ngabomvu Inkezo yeNetOne iBosso


Umdlali weHighlanders uKnox Mutizwa

Amaqembu enguqu athi eleDynamos, eleHighlanders, eleCAPS United kanye leleChicken Inn yiwo asefinyelele kusigaba sama semi-final enkezo yeNetOne Easycall Super 8 Cup.

Emidlalweni yama-quarter finals edlalwe ngempelaviki, iqembu leChicken Inn linqobe eleZPC Kariba nge 4 ka 3 ngoMgqibelo ngemva kokutshaywa kwembekwa enkundleni yeNyamhunga edolobheni leKariba.

Umdlalo lo ubuphele zingutshiki lobhanqa 0-0.

Komunye umdlalo obukhona ngoMgqibelo iqembu leCAPS United litshaye eleHwange nge 3 ka 1 enkundleni yeNational Sports Stadium.

NgeSonto iqembu leDynamos linqobe eleHow Mine nge 1 ka nya enkundleni yeRufaro kwathi eleHighlanders lanqoba eleFC Platinum nge 1-0 enkundleni yeMandava.

Ohlohlele iHighlanders nguKnox Mutizwa yena othi kuzamele baphakamise inkezo yeNetOne EasyCall Super 8 ukuze bathokozise abalandeli babo njengoba bengadlalanga kuhle kusigaba sePremier Soccer League lonyaka.

"Siyathaba njalo sifuna abalandeli beHighlanders basilandele size siyefika ku-final. Yiyo inkezo esingabathabisa ngayo leyi," kutsho uMutizwa.

Umdlali weFC Platinum uElvis Moyo uthi iqembu lakhe lizilahlise ngokukhutha amathuba eliwatholileyo emdlalweni walo leBosso njalo uthi sekuzamele libophe ziqine kumkhankaso walo wokuphakamisa isicoco seLeague.

"Umdlalo ubunzima kodwa sizamile," kuchasise uMoyo. "Sikhuthile amathuba bacina besijezisa ngoba iphutha langemuva yisijeziso. It's part of the game."

Iqembu elizaphakamisa inkezo yeNetOne EasyCall Super 8 lizathola inkulungwane ezingamatshumi ayithobaminwembili zamadola eMelika.

Umdlalo weCricket

Iqembu elimela iZimbabwe emdlalweni kakhilikithi linqobe eleBangladesh ngama wickets amathathu emdlalweni wesibili owohlobo lweTwenty20 odlalelwe khonale kweleBangladesh ngeSonto.

IBangladesh yiyo eqale ukutshaya ibhola yathola ama-runs alikhulu lamatshumi amathathu lanhlanu (135).

Lilahlekelwe ngabadlali abayithobamunwe munye kwathi eleZimbabwe seliphendula lathola ama-runs alikhulu lamatshumi amathathu lesithupa (136) njalo lalahlekelwa ngabadlali abayisikhombisa.

Limpumela itsho ukuthi umncintiswano weTwenty20 uphele zingutshiki lobhanqa 1 ka 1 njengoba iqembu leBangladesh linqobe kumdlalo wakuqala ngama wickets amane ngoLwesihlanu.

Imidlalo yohlobo lweTwenty20 ilandele emithathu eyohlobo lweOne Day International yona ephele iqembu leBangladesh linqobe kuyo yonke.

please wait

No media source currently available

0:00 0:02:11 0:00
Lapho esitholakala khona
XS
SM
MD
LG