amalinks wokungena

Breaking News

Izakhamizi zakoBulawayo: Ikhansili Kayisinike Izindlu zeMakokoba leIminyela


Makokoba Bulawayo
Izakhamizi zakoBulawayo zithi ikhansili kumele inike izindlu ezisemzini weMakokoba, Iminyela kanye leBurombo Flats abahlala kuzo babe ngabanikazi abazenelisa ukuzigcina ngoba sezidilika abantu behlezi kuzo ikhansili isehluleka ukuzilondoloza.

Izindlu lezi ezakhiwa ngesikhathi ilizwe lingakatholi uzibuse zilokhu zihlala imuli ngambili ngantathu ngoba ikhansili isehluleka ukwakha izindlu ukuze yehlukanise imuli lezi.

Izindlu lezi lokhu ziyimpahla kakhansili, abahlala kuzo babhadala umthelo werenti nyangazonke.

Inengi lalezizindlu alilazambuzi, intungo kanye lamazenge kuyawa njalo ezinye sezidilika ngenxa yokungalungiswa.

Ezinye zalezizakhamuzi zihlala emakhitshini lemuli kusukela ukudilizwa kwezindlu ngaphansi kohlelo lukaMurambatsvina.

Isakhamuzi, uNkosikazi Mercy Sibanda, uthi ikhansili kumele iqakathekise ukwakha izindlu, lezi izinike abahlala kuzo kulokuqhubeka ithatha imali kazulu kodwa isehluleka ukulungisa uphahla kodwa lokhu.

Uthi indlela abantu abahlalisane ngayo emizini le ayikhwabitheki yiyo ekhuthaza ubusela kanye lokungaziphathi ngenxa yokuminyana.

Ukhansila kaWard 8, uNkosikazi Sheila Musonda uthi ikhansili imelele ukulungisa izindlu lezi, izifake lezambuzi njalo yakhe ezinye anduba izinike izakhamizi.
Uthi lanxa ikhansili ilungisa indawo zokuthi kwakhiwe izindlu ezintsha, lezi zibiza imali ephezulu kakhulu okokuthi abantu bangakhitshwa kulezi ezekhansili abasoze benelise ukuthenga ezabo.

UNkosazana Silethemba Mathe owenhlanganiso yeWomen in Leadership Development, eyiyo eqoqa imihlangano phakathi kwabokhansila lezakhamizi, uthi uhlelo lwabo olubizwa ngokuthi ‘Where is my Public Servant’ lujonge ukuthi okhansila bangahambi balobe ngemva kokukhethwa kulezi zikhundla kodwa bazi ukuthi kulezakhamizi ezibakhangeleyo njalo ezilenhlelo ezifuna ziqhutshwe.

Okwakhathesi, ikhansili yakoBulawayo ilabantu abangaphezu kwekhulu lenkulungwane – 100 000 ababhalisayo abalokhe bemelele ukuthola izindlu.
XS
SM
MD
LG