amalinks wokungena

Ezinye Izakhamizi zeGwanda South Kazilwazi Uhlelo Lwe Biometric Voter Registration


Omunye walabo ababhalise amagama kugwalo lokuvota koBulawayo ...

Inengi lezakhamizi zemaphandleni eGwanda, ezansi yeMandebeleni, lisemnyameni ngohlelo lokubhalisa ukuvota oluqhubekela phambili emadolobheni .

Ukuswelakala kwemibiko ephuma emisakazweni yeradio kanye lakumabonakude we-television sokudale ukuba uzulu wasemaphandleni ehlale engazi okwenzakala elizweni.

Kusukela eMlambapheli kusiyafika eNhwali inengi lezakhamizi lithi lisemnyameni ngodaba lokubhalisa kakutsha ukuvota kusetshenziswa imitshina yangalezi nsuku eye Biometric Voter Registration (BVR).

Kuthi uzulu ophansi kukaNduna Ketso Mathe esiqintini seBolamba uthi loludaba uluzwa ngamahungahunga.

UNkosazana Ntombikayise Nyathi, ohlala emangweni weSitakeni eNhwali, uthi baluzwela kweminye imisakazo loludaba lokubhalisa ukuvota ngoba izigxingi zabo zibamba amagagasi akwele South Africa.

“Uma into ezinengi zisenzakala elizweni okunye sesiphonguzwa ngama WhatApp kodwa thina ukuthi sizwe intathelizindaba kuhle kumbeni emaradiweni kumbeni kumatv akubambi ngoba amagagasi ethu ngapha abamba iSouth ukwedlula iZimbabwe.

“Siphongukwazi ukuthi sizavota kodwa ukuthi ukubhalisa sokuqalisile kumbe kuyaqalisa nini hayi asikabi lolwazi esikwaziyo yikuthi kumele sibhalise sizavota kumnyaka ozayo but ukuthi uhlelo lwakhona seluqalisile kumbe luyabuya nini luyabe lusenzelwa ngaphi asikabi lolwazi lonalolulu alukafiki kithi eNhwali.”

UMbekezeli Nyoni, owe Ntepe, uthi sezwile ngodaba lokubhalisa kodwa laye kusobala ukuthi akazi lutho kangako ngalo.

“Sengizwile sibili kuthiwa ukuyabhaliswa kumele sibone osubhuku, osobhuku yibo abazali tshengisa abakhulu bangakhona … ”

UNkosazana Kanah Nsingo oweZelezele laye uthi kalalwazi ngaloluhlelo lobanje eke wezwa kukhulunywa ngalo emsakazweni weStudio 7.

“Thina asikabi lolwazi khona siyaqala ukubhalisa mhlaka 26 yikho sizabona ukuthi kuhamba njani. Abantu bathi bona abaluzwisisi ngoba siyezwa lakumaradio ukuthi imitshina ingani iyasilelela … Pho bathi kusebenzeka njani njengoba izinto zokubhalisa zingekho?”

UMnu. Jethro Tabona Moyo, oweMlambapeli oleminyaka engamatshumi ayisikhombisa yokuzalwa, uthi kuqakathekile ukuthi abantu babhalise ukuthola ilungelo lokuvota.

“Abase South Africa siyabacela ukuthi babe ngabanye ababuya bezovota vele ngoba okukhona uma bengazanga beqala baregister sibona engazathi kuzabalodubo. Ukusitshela kwabo basitshele ukuthi sizabe siregister kutsha loba wawuregistile loba ungabhalisa kuyafanana sokumele sizihluphe ngokuyaregister.”

Isikhulumi sebandla leMDC-T eZansi yeMandebeleni umnumzana Ekem Moyo uthi isadingeka imfundiso emaphandleni ngodaba lokubhalisa ukuthola ilungelo lokuvota.

“Ulwazi lwakhona lusalumfitshane kakhulu kuyadingakala nje ukuthi kubelendlela ukuthi ivoter education ifakwe lapha emaphandleni ibe esibangeni esiphezulu ngoba abantu abakazwisisi.”

Inengi labantu liyehluleka ukwehlukanisa uhlelo lokuthatha izithupha ezintsha ezeplastic kulabo abalezezenge, lalolu olokubhalisa ukuthola ilungelo lokuvota.

Ababona ngokuqhutshwa kohlelo lokubhalisa abantu ukuze babe lelungelo lokuvota ngomnyaka ozayo ngemitshina yakulezi nsuku abe Zimbabwe Electoral Commission bathi basamelele eminye imitshina yeBVR ukuze baqale uhlelo lokubhalisa ukuvota emaphandleni.

Facebook Forum

XS
SM
MD
LG