amalinks wokungena

Breaking News

Izakhamizi zeMakwe eGwanda Zithi Zethukile Ngokufelwa Yizifuyo Ezimunywa Igazi Yisinanakazana Esingaziwayo


NgoLwesihlanu imbuzi ezilitshumi lanhlanu zitholakale zifile ekuseni ngmva kokulunywa entanyeni zamunywa igazi njalo inengi lezakhamizi lithi licabangela ukuthi le kungaba yimisebenzi yabathakathi.

Izakhamizi zeMakwe eGwanda North zikhuza imihlolo ngemva kokufelwa zimbuzi zazo ezedlula amatshumi amahlanu ngendlela engajwayelekanga kunyanga ezisanda ukwedlula.

NgoLwesihlanu imbuzi ezilitshumi lanhlanu zitholakale zifile ekuseni ngemva kokulunywa entanyeni zamunywa igazi.

Sixoxe loNkosikazi Sheila Sibanda umgcinisihlalo weMakwe Irrigation Scheme othi abantu badideke amakhanda ngalesisiga.

Inengi lezakhamizi licabangela ukuthi le kungaba yimisebenzi yabathakathi.

Kusenjalo, Izakhamizi ze Ndwangu Line eSiyaphambili eInsiza zithi sezidlela evalweni ngenxa yengwe ezalele kulindawo, esibulele amathole afika phose alitshumi, yalimaza amanye.

Izakhamizi ezixoxe lomsakazo we Studio 7 zithi kusukela ngenyanga kaNcwabakazi kusiyafika lamhlanje ingwe le isidle amathole ayisitshiyagalombili, amanye atholakala elimele.

Isigaba seNdwangu Line sigonjolozelwe zintaba njalo ezinye zisekela umfula uMzingwane lapho okucatshangelwa ukuba lingwe ihlala khona labadlwane bayo ebhalwini.

Lokhu sekutshiye izakhamizi zakulumango zisesabela ukuthi zizaphelelwa yizifuyo.

Usobhuku weNdwangu Line UMnu. Godfrey Ndlovu uthi sebehlezi bevalele amathole besesaba ukuthi bangawavulela azadliwa yingwe.

Umlisa kaWard 1 eInsiza North UMnu. Michael Mahlangu uthi izakhamizi zeNdwangu Line zifuna ukuthi lingwe izingelwe ukuze zikhululeke.

UMahlangu uphinde wathi lanxa endulo ingwe ibizingelwa ngamadoda ibulawe kulezinsuku kunzima ngoba umthetho ungavumi.

"Khathesi ukuthi uphume ijumo sekunzima njalo abasekho abantu abelizibindi njengakudala njalo lomthetho awuvumi ngaphandle kokuthi kudingwe amaRangers,mina ngisesengumfana sake sahamaba sisiya khonale futhi phansi sekuthiwa sekudle inkomo khonangale kodwa sehluleka ukukubulala kwabaleka."

Ukhansila kaWard 1 eInsiza North UMnu. Festus Ndlovu uthi sebethethe amanyathelo okuzingela lingwe ngoba isiyingozi lebantwini.

"Udaba lwengwe kathesi esesikwenzile ngikhulume lo District Coordinator sesimelele amahunters kuphela ukuthi babuye , they were supposed tom come today so sihambe labo sabatshengisa lapho okukhona. Kuletshiki kuyababhongela babalekile amanye amafarmers batshiya inkomo yiwo umonakalo esiwubonayo ukuthi nxa kubhongela umuntu kutsho ukuthi sekungambamba," kutsho ukhansila.

Kulicala ukubulala inyamazana lanxa ziyingozi ngoba yikwephula imithetho yelizwe eyokulondoloza inyamazana zendle njalo labo abatholakala benze lokhu balakho ukubhadaliswa imali engafika amadola eMelika azinkulungwane ezingamatshumi amabili-US$20 000.

Obona ngokukhitshwa kwembiko kugatsha lwezokulondolozwa kwenyamazana zasendle uMnu Tinashe Farawo uthi kabakatholi mbiko ngalezizehlakalo.

Ukhuthaza izakhamizi ukuthi zingahambi ebusuku, zibikele ugatsha lwakhe ngokuphangisa lapho zithe zabona lezinyamazana eziyingozi ukuze labo bathathe amanyathelo ngokuphangisa njalo zivalele izifuyo.

XS
SM
MD
LG