amalinks wokungena

'Izakwenza Kahle Lonyaka iBulawayo City FC'

  • Joseph Njanji

Abadlali beqembu leBulawayo City.

Umqeqetshi weqembu lenguqu ele Bulawayo City, uMandla Mpofu, uthi ukhangelele ukuba iqembu lakhe liqede imidlalo yalo likusigaba saphezulu engalaneni yemiklomelo njengalokhu elakwenza nyakenye ngomnyaka walo wakuqala owokudlalela esigabeni saphezulu.

UMpofu, osanda kuqhatshwa liqembu leli, uthi amalungiselelo abo ahamba kahle kakhulu njalo sebebumbe iqembu eliqine kakhulu elilakho ukuncintisana lamanye amaqembu adlala kusigaba se Premier Soccer League.

“Iqembu selibumbekile sibili okokuthi mzwana siyaqala umdlalo wethu wakuqala lathi sizahamba siyengqikilana labanye singasoze siyanise umphakathi ngoba leli liqembu labantu baka Bulawayo omuhle.”

Iqembu le Bulawayo City lingene ngomnyaka ka 2016 kusigaba se Premier Soccer League okutsho ukuba lonyaka ngumnyaka walo wesibili lidlala kusigaba saphezulu. Nyakenye liphutshe liphakathi laphakathi kwengalane yemiklomelo njalo uMpofu uthi ukhangelele ukuba lonyaka liqede likusimo esifanayo kumbe endaweni ephezu kwalapho.

“Ngokudlala okwenze iqembu nyakenye sikhangelele ukuba siqede sikundawo ephezu kwethoba minwe mbili njalo siliwise ukuphakamisa inkezo ikanti labafana bethu betholakale kuluhlu lwabadlali abadlale kuhle ekupheleni komnyaka lakumaqembu amela isizwe emdlalweni wenguqu.”

Iqembu le Bulawayo City lizaqala ukudlala lamaqembu ako Bulawayo kumncintiswano we PSL njengoba lizadlala leqembu le Highlanders emdlalweni walo wakuqala njalo ele Bosso yilo eliyabe lisekhaya njengoba lawamaqembu esebenzisa inkundla ye Barbourfields, kowesibili lizemukela ele Chicken Inn.

Emdlalweni walo wesithathu iqembu le Bulawayo City lizavakatshela ele Shabanie Mine kuthi kowesine lizemukela elinye njalo iqembu lenkabazwe ele FC Platinum.

Iqembu le Chicken Inn lidinge abadlali abambalwa abalesikhathi eside bedlala kusigaba se PSL njalo laba ngababalisa uHeritein lo Thembani Masuku abakade bedlalela iqembu le How Mine, uBhekimpilo Ncube owayedlalela iqembu le Chicken Inn kanye lo Douglas Sibanda obedlalela iqembu le Highlanders.

Facebook Forum

XS
SM
MD
LG