amalinks wokungena

Breaking News

IZanu PF Ixotsha Ezinye Njalo Iziphathamandla Zayo


Zanu PF

Ibandla leZanu PF, selengezelele inani leziphathamandla esezixotshiwe kuleli bandla zisetheswa umlandu wokusebenzelana lobengumsekeli kamongameli welizwe lebandla uNkosikazi Joice Mujuru

Idale lePolitburo lebandla leli lihlale ngoLwesine lavumelana ukuxotsha owake waba ngumgcinisihlalo waleli bandla eMashonaland East njalo elilunga ledale lephalamende umnumzana Ray Kaukonde, owake waba ngumpathintambo wezemfundo unkosikazi Olivia Muchena, ummeli weMwenezi ephalamende, umnumzana Kudakwashe Bhasikiti, obemmela iMbire ephalamende, umnumzana David Butau, owake waba ngumgcinisihlalo weMasvingo, umnumzana Killian Gwanetsa, owake waba ngumpathintambo wamandla kagetsi umnumzana Dzikamai Mavhaire, umnumzana Claudious Makova obelilunga ledale le Central Committee, kanye lomnumzana Kudakwashe Gope obeyisiphathamandla sesigabeni seMashonaland Central.

IPolitburo ivumelene njalo ukumisa ukuba ngamalunga kwabantu abalitshumi lantatu okweminyaka emihlanu elandelayo. Amalunga la agoqela owake waba ngumpathintambo wezisebenzi umnumzana Nicholas Goche, obelilunga lePolitburo umnumzana Tendai Savanhu, umnumzana Munacho Mutezo, umnumzana Chrsitopher Chigumba, umnumzana Amos Midzi labanye.

Uzulu weZimbabwe uthi ukhathazekile ngempi yokubanga izikhundla esebandleni leli, esesabela ukuba kuzachithwa isikhathi esinengi kulwiwa endaweni yokuqhuba inhlelo zokuthuthukisa inotho yelizwe ezifana lolweZIMASET, osekukhanya solukhohlakele.

Ingcwethi kwezombusazwe zithi okwenzakala kuZanu PF kuveza sobala ukuba impi yokubanga ukuthi ngubani ozasala ephethe intambo zombuso umongameli Robert Mugabe esesukile iyaqhubeka ngamandla.

Umnumzana Dumisani Nkomo ngeinye yalezingcwethi kwezombusazwe esebenzela koBulawayo. UNkomo uyagcizelela ukuba ukufuthelana kubangwa izikhundla kuvele kugxile ekuthini iziphathamandla ezinengi ziziphendlela indawo enhle zokusala zikhona lapho sokuthathwa intambo zobukhokheli ekusukeni kukaMugabe esikhundleni.

Lokhu uNkomo uthi, kuzakwenza lolohlangothi oluqinileyo ukwedlula olunye kube yilo oluzanelisa ukubusa ngoba lulamalunga amanengi akuhulumende kanye lasebandleni.

Umnumzana Zenzo Mhlanga oyisakhamuzi se Mhandara eHarare, ovumelana lezinye ingcwethi zezombusazwe uthi okudanisayo yikuba kalikho ibandla eliphikisayo elingasebenzisa lelithuba ukuhluthuna intambo zombuso welizwe nanko lele MDC elikhokhelwa ngumnumzana Morgan Tsvangirayi lizehlulekela lalo lilokudonselana phakathi kwalo.

Lokhu kugcizelelwe njalo ngomunye wabasakhulayo ohlala emzini weMufakose eHarare, umnumzana Simbarashe Tshuma.

UTshuma uthi okudanisayo laye lokho okwenzakala kulelibandla njengoba kusitsho ukuba ukuqhutshwa kwenhlelo zokuthuthukisa umnotho welizwe sezibekwe eceleni ngoba inkokheli ziphatheke kulezimpi.

Ekupheleni komhlangano wedale laphezulu ele Politiburo kuZanu PF, izolo ntambama kuxotshwe abantu abangaba yisikhombisa, kuthi abalitshumi lantathu bamiswa ukuphatha izikhundla ebandleni leli okweminyaka esukela kwemithathu kusiya kwemihlanu. Kodwa bakhona abaxoleliweyo ngoba kuthiwa kabalawo umlandu.

Asenelisanga ukuba sikhulume lomgcinisihlalo waleli bandla umnumzana Simon Khaya Moyo ukuthi sizwe ukuthi yena uthini ngalolu daba.

XS
SM
MD
LG