amalinks wokungena

Breaking News

IZanu PF Iyasixhopha Ukuze Siphume Kuhulumende: MDC-T


Icele leMDC elikhokhelwa nguMnu Morgan Tsvangirai lithi amapholisa abopha amalunga alo mahlayana esetshenziswa yiZanu PF ngenjongo yokulicunula ukuze liphume kuhulumende womanyano.

Ukubotshwa komphathintambo osebenzela ehofisi kaTsvangirai ngoLwesihlanu, uMnu Jameson Timba, esetheswa icala lokweyisa uMongameli Mugabe, kucunule kakhulu lelibandla.

Ekhuluma emhlanganweni owenzele koBulawayo labasekeli bakhe ngeSonto, uTsvangirai uthe kasoze aphume kuhulumende womanyano lo lanxa yena ngokwakhe angaze abotshwe.

NgoMbimbitho uTsvangirai wethusele ukuphuma kuhulumende womanyano kulandela imbiko ebisithi ulakho ukubotshwa ngemva kokuhlambaza imithethwandaba esithi isekela ibandla leZanu PF.

UMnu Timba yena ukhululwe ngumthethwandaba weHigh Court ngeSonto. Umahluli uthe ukubotshwa kwakhe bekungekho emthethweni. Ibandla likaTsvangirai lithi abeZanu PF yibo abakhankasele ukubana uTimba abotshwe.

Amaphephandaba kahulumende lawo ayaphambili ngokuhlambaza iziphathamandla lamalunga eMDC. NgeSonto iphephandaba leThe Sunday Mail liveze ukuba umphathintambo wezemali uMnu Tendai Biti uthandana lomfazi womuntu asebenza laye.

NgoMvulo khona amalunga eZanu PF atshengisele ehofisini kaBiti esithi kumele engezelele izisebenzi zikahulumende iholo.

Kodwa umkhokheli weZanu PF edale lephalamende uMnu Joram Gumbo ukulandule ukuba ibandla lakhe lisebenzelana lamapholisa ekuhlukumezeni amalunga eMDC.

Okuhambelana lalokhu

XS
SM
MD
LG