amalinks wokungena

Breaking News

Izenzo Zika Grace Mugabe Zizondisa Izizalwane zeZimbabwe Ezihlala eSouth Africa


UNkosikazi Grace Mugabe

UNkosikazi Grace Mugabe, umkamongameli weZimbabwe, usebangele ukuthukuthela okukhulu kwele South Africa ngemva kokuba owesifazana wakwele South Africa emmangalele ngecala lokumtshaya kabuhlungu, aze amthole elabantwabakhe ehoteleni abahlala khona eSandton eJohannesburg.

Intukuthelo yengezelelwe yikutholakala kokuthi imibiko kahulumende ebithe usezinikele emapholiseni njalo uzamiswa phambi komthethwandaba, ibingeyamanga.

Umphathintambo wogatsha lwezamapholisa kwele South Africa umnumnzana Fikile Mbalula utshele abezindaba ukuthi unkosikazi Grace Mugabe usevumile ukuthi uzazinikela emapholiseni abesevela emthethwandaba ngecala lokutshaya uNkosazana Gabriella Engels.

“Kasabotshwanga ngoba uhle wazinikela emapholiseni, lokho yikho okwenze ukuthi kungasadingeki ukuthi amapholisa ayembopha.”

UMongameli Robert Mugabe lomkakhe uNkosikazi Grace Mugabe.
UMongameli Robert Mugabe lomkakhe uNkosikazi Grace Mugabe.

​Ngemva kokuvela kwemibiko ephikisanayo yokuthi unkosikazi Mugabe uzamiswa kuwuphi umthethwanda, kubuye kwavela omunye umbiko othi useyehlulekile ukuziletha emapholiseni kodwa wakhetha ukuthi amagqwetha akhe akhulumisane lamapholisa.

Lokhu kuletha ukuthukuthela kakhulu ikakhulu ngemva kokuba imbiko yokuthi usezinikele emapholiseni yethulwe ngumphathintambo wogatsha lwezamapholisa. Kodwa ngaphambilini uMnumnzana Mbalula ubeke wakuchaza ukuthi kungaba lohlupho ukubopha unkosikazi Mugabe.

“Kuyeneliseka ukuthi abotshwe kodwa nxa engene kuleli esebenzisa iphasipoti yeziphathamandla zikahulumende, iyamvikela ekuthini abotshwe. Kodwake lokhu akutsho ukuthi angeke abotshwe, kuyeneliseka ukuthi abotshwe.”

Kodwake ezinye ingcintshi zomthetho zithe akulanto evimbela ukubotshwa kukankosikazi Mugabe njengoba engezanga ngokomsebenzi kweleSouth Africa.

Ekhuluma labezindaba unkosazana Gabriella Engels uthe unkosikazi Mugabe umbhaxabule kabuhlungu ngesikhathi ethola yena labangane bakhe belabantwabakhe abangabafana abahlala eJohannesburg ngeNsonto ntambama.

“Ngitshaywe ngunkosikazi Grace Mugabe, mina labangane bami ehoteleni kanti abalindi bakhe bebemile bebukele. Bengingazi ukuthi lumama ongitshayayo ngubani. Bengingazi ukuthi uBellarmine yindodana kamongameli Mugabe, ngize ngaba kwazi lokhu sengitshelwa ngonogada sengiphumile ehoteleni.”

UNkosikazi Grace Mugabe
UNkosikazi Grace Mugabe

Owesifazana lo uthi unkosikazi Mugabe ubemtshaya ngentambo yamagetsi wasebenzisa ikhanda lale intambo elilensimbi wamtshaya wamdabula eliphaqeni waba lamanye amanxeba esiphundu.

Uthi konke kusenzakala abantwana bakankosikazi Mugabe bathe bebona unina engena baphuma babaleka kanti abalindi bakankosikazi Mugabe abalitshumi bebemi bebukele.

UNkosazana Engels uthi akakwazi lokuthi ubetshayelwani.

“Kulamahungahunga athi ngikhombe omunye wamadodana kamongameli Mugabe. Lokhu ngamanga. Okwesibili yikuthi angisuye umahotsha. Bengikule ihotela ngemva kokunxuswa ngumngane wami ukuthi sizokwejisa ngase ngisiza labangane bami ababili. Lokhu kungakenzakali, amadodana kaMugabe abevele engekho kule indlu yehotela ebesikiyo labangane bami.”

Lesi senzo sikaNkosikazi Mugabe sesisolwe kakhulu yizizalwane zeZimbabwe kwele South Africa. UNkosazana Sikhanyisiwe Khumalo uthi kufanele abhekane lomthetho.

“Into eyenziwe ngumama wethu uGrace Mugabe ayilunganga neze. Kumele vele ukuthi abhekane lomthetho. Usifundisani thina? Ufundisani abantwana? Usehlisile isithunzi seZimbabwe kakhulu.”

UMnu. Fikile Mbalula wakwele South Africa.
UMnu. Fikile Mbalula wakwele South Africa.

Omunye njalo weZimbabwe uNkosazana Lindiwe Sithole uthi lesi senzo asikhangelelwanga kumama wesizwe.

“Umama uGrace Mugabe uphambanise kakhulu.Bekufanele yena akhulume kahle labantwana laba ababonise njengomzali, ikakhulu futhi akuyona ingane yakhe futhi akuyona ingane yasezweni lakhe.”

Kusenjalo kubikwa amadodana womabili kaMongameli Mugabe esephinde axotshwa ewetelenile ngemva kwesenzo sikaMongameli Mugabe kukanti amapholisa abelokhu endimimbili ngokuthi unkosazana Mugabe uzabotshwa na lokuthi uzamiswa yini emthethwandaba ngecala leli.

Lobanje bekungakabi lombiko owethulwe yihofisi kamongameli Mugabe ngaloludaba, umbiko owethulwe ekhelini yeTwitter yeZanu PF uthi unkosikazi Mugabe uhlaselwe ngunkosazana Engels, kodwa bengethuki ngoba uphephile.

Facebook Forum

XS
SM
MD
LG