amalinks wokungena

Breaking News

ZIA: Ayimanyaniswe Imithetho Yokusungulwa Kwamabhizimusi Abemazweni eZimbabwe


Zimbabwe Investment
Zimbabwe Investment

Abe Zimbabwe Investment Authority batshela ikhomidhi ebona ngezobudlelwane lamanye amazwe eyedale lephalamende ukuba kuyadingeka ukuba kubekwe imithetho ephathisa ukuhuga abafisa ukuzasungula amabhizimusi eZimbabwe kanye lokumanyaniswa kwengatsha zikahulumende eziphatheke emisebenzini yokutholisa osomabhizimusi bakwamanye amazwe ingwalo ezifunakalayo ukusungula amanye elizweni.

Esethula umbiko wakhe phezu kwesimo sokusungulwa kwamabhizimusi aphandle kwelizwe, phambi kwekhomidhi yedale lephalamende lamuhla, umqondisi we ZIA umnumzana Richard Mbayiwa uveze ukuba umumo okhona okwakhathesi eZimbabwe uphazamisa imizamo yokuhuga abafisa ukuzasungula amabhizimusi abo kuleli ngoba lokhe siphansi kakhulu isilinganiso sabosomabhizimusi ababuyayo nxa kuqathaniswa lamanye amazwe angomakhelwane esigabeni sangezansi kwezwekazi leAfrica.

Ugcizelele njalo okuhlezi kukhulunywa ngakho okufana lokungacaci kwemithetho ephezu kokusungula amabhizimusi kuleli okubalisa owe Indiginisation kanye lokwanda kwengatsha zikahulumende eziphatheke udaba lokutholisa osomabhizimusi ingcwadi lamalayisensi afunakalayo.

Imibiko yokungathembeki ehlezi iphuma ezindabeni ibikwa ingenye eyethusa osomabhizimusi abafisa ukuzasungula amabhizimusi kuleli.

Esinye isakhamuzi seHarare esithande ukwaziwa njengoNaka P kuphela utshele iStudio Seven ukuba ngaphandle kokuba uhulumende alungise okumele kulungisiswe, isimo kasiyikuguquka ngoba engekho ofuna ukuthathelwa imali yakhe ngendlela ezingaqedakaliyo.Uthi u Naka P nxa kungasathathwanga manyathelo phezu kwemibiko eveza ukungathembeki sekukusibanga esiphezulu, akekho usomabhizimusi ongaza ukuzathela imali yakhe esazi mhlophe ukuba amathuba wokuthi intshontshwe emanengi.

Lokhu abe ZIA bathi sekubangele ukuba ilizwe libe kusibanga esiphansi kakhulu kulamanye amazwe kulumhlubulo kusukela ngomnyaka ka2012 ngoba ingekho inguquko ebonakalayo.

Bakhankasela ukutholiswa kwemali eyanelayo abeZIA ukuze baqhube imisebenzi ngemfanelo njengoba incane kakhulu abayabelwa lugatsha lwezemali.

Ukumanyanisiswa kwemithetho ephezu kokutholiswa kwama licence okusungula amabhizimusi kuleli ube munye lengatsha zikahulumende eziphatheke kulomsebenzi wokutholisa lezongcwdi kwabafisa ukuzasungula amabhizimusi, abeZIA bathi kungaphathisa kakhulu ekuhugeni osomabhizimusi bakwamanye amazwe eZimbabwe.

Kunje bathi inhlangothi ezibalisa olwebhanga elikhulu lelizwe, i Reserve Bank of Zimbabwe, uhlangothi olubona ngezokulondolozwa kwemvelo olwe Environmental Management Agency, oluhlawulisa imali zemithelo olwe ZIMRA kanye lolubona ngokungena lokuphuma kwabantu elizweni olwe Immigration kungezinye zenhlangothi okumele osomabhizimusi bakwamanye amazwe bedlule khona bedinga incwadi zokusungula ibhizimusi kuleli kodwa zonke zikungatsha ezitshiyeneyo zikahulumende.

XS
SM
MD
LG