amalinks wokungena

Breaking News

AbeSRC Babamba Umhlangano Wokulimukisa Uzulu Ngezikhathi Zokhetho


Abaphila ngokuthengisa ucansi bakhala ngokuthi ubudlelwano babo lamapholisa abumanga kahle njalo bulakho ukuqhubeka bungabuhle ngesikhathi ilizwe lisiya ekhethweni.

UMqondisi weSRC, uNkosikazi Musa Sibindi, uthi yikho bebe lomhlangano ngoLwesithathu, emizameni yokulungisisa ubudlelwano babo lamapholisa.

"Sikesahlangana lokudlwengulwa kwamalunga ethu amanengi ngakho sikhangelela ukhetho oluzayo sikubone kukuhle ukuba sakhe ubudlelwano obuhle lamapholisa basifundise ngokuthi siziphathe njani njalo basifundise ngamalungelo ethu".

Elinye lamalunga eSRC, uNkosazana Maroe Phiri, uthi ngomumo okhona khathesi balokwesabela ukuthi ngesikhathi sokhetho uzaba mubi ngamandla.

"Sivele asila budlelwano obuhle lamapholisa njalo isikhathi esiyakhona sizizwa silokwesaba ngitsho lokuyavota ngoba asilasiqiniseko sokuthi lowo ozanqoba ekhethweni yena uzasiphathanjani".

Ophila ngokuthengisa ucansi ongene lumhlangano, uNkosazana Nomusa Ndiweni, laye uvumelana loNkosazana Phiri esithi amapholisa awamukeli kuhle indaba zabo nxa beyemangala.

"Thina esikubhizimusi lokuthengisa ucansi asilabudlelwano obuhle lamapholisa njalo inkinga esibhekana lazo kubhizimusi amapholisa awasamukeli ngokusemthethweni. Sikhangelele ubunzima obudlulise amalawulo ngesikhathi sokhetho".

UMnu. Daniel Kambule, isakhamuzi sakoBulawayo laye okade esemhlanganaweni lo, uthi ubudlelwano lamapholisa abukho.

"Lathi singabantu njalo sikhangelele ukuphathwa kuhle ngamapholisa kodwa kubanzima ukuyamangala lapho ungadlwengulwa njalo sikubona kuzakuba phambili ngesikhathi sisiya ekhethweni kunyanga ezayo."

Amapholisa asekhuthaze abantu ukuthi bazibambe, bangakhulumi indaba abangazaziyo ikakhulu ngamabandla ezombusazwe.

Bakhuthaze uzulu ukuba angesabi amapholisa kodwa amangalele labo abephula amalungelo abo.

Isikhathi esinengi abaphila ngokuthengisa ucansi bayadlwengulwa kuthi abanye badojwa sebefile. Kusikhatshana esedluleyo koBulawayo kudojwe abantu abane befile kuze kube lalamhla lokhu lokhe kungakatholakali ubufakazi obukhomba umbulali.

Ngenyanga ezayo mhlaka 30 Ntulikazi iZimbabwe ikhangelele ukuba lokhetho lokudinga umongameli welizwe, amalunga edale lephalamende lawe Senate lamakhansila. Ngakho-ke inhlanganiso ezilwela amalungelo oluntu zikhuthaza uzulu ukuba alimuke ukuhlanganiselwa kudlakela lwezombusazwe lapho amabandla ezombusazwe ekhankasela usekelo.

please wait

No media source currently available

0:00 0:02:53 0:00

Facebook Forum

XS
SM
MD
LG