amalinks wokungena

'IZimbabwe IBhidlizwa Yiziphathamandla Zikahulumende Hatshi Amanye Amazwe'

  • Bennedict Nhlapho

Izizalwane zeZimbabwe sezikhuthaze uhulumende ukuthi ekele ukugcona amazwe entshonalanga ngenhlupho ezidalwe yikwehluleka ukubusa ngokuqondileyo.

Lokhu kulandela inkulumo kamphathintambo wezomvikela, uMnumnzana Sydney Sekeramai, othe ezokuthula eZimbabwe ziphazanyiswa yimizamo yamazwe entshonalanga yokufuna ukugenqula umbuso weZanu PF.

Ekhuluma embuthanweni wamabutho eHarare ngoMvulo, uSekeramai uthe imizamo yamazwe aphetsheya yokufuna ukugenqula uhulumende yiyo ephazamisa ukuthula eZimbabwe.

Uthe lamazwe afuna ukubuyisela emuva uhlelo lokwabiwa komhlabathi wathi yiwo abangela ubunzima kwezomnotho, ukwethulwa kwemibiko engayisiyo, ukugxamukela kwezombusazwe lokukhuthaza ukubandlululwa kweZimbabwe ngamanye amazwe.

Linkulumo isiphikiswe kakhulu linengi lezizalwane zeZimbabwe ezithi kakusilo qiniso ukuthi ingxabangxoza yesimo esiseZimbabwe ibangelwa ngamazwe aphetsheya.

Isiphathamandla sebandla le United Democratic Front, uMnu. Andrew Nyathi, uthi ilizwe licuywa yizo iziphathamandla hatshi amazwe angaphandle.

Uthi kusegcekeni ukuthi ubunzima bezenotho obuse Zimbabwe khathesi bubangelwa yinkohlakalo yeziphathamandla zikahulumende weZanu PF.

Abanye bathi izehlakalo ezibalisa ukunyamalala kwemali yezenjiwayo efika amadola angamabhiliyoni alitshumi lanhlanu, ukutshotshwa kwemali emankampanini kahulumende inengi lawo asequqe ngamadolo, inotho yabaphathintambo eyesabekayo, lokunye okunengi nengi, kukhombisa sobala ukuthi amazwe entshonalanga awalasandla kulokho.

Le yinto egcizelelwa yisizalwa yisizalwane seZimbabwe umnumnzana Simba Nembaware.

“Bona njengenkokheli bayehluleka ukuqondisa ilizwe, ngingathi amapolicies, ukubuya lamapolicies ayenza ukuba umnotho wethu uthuthuke, njalo lokuthi kube lokuthula kwezepolitiki lezomnotho. Njengoba besehluleka kulula ukuthi udinge omunye umuntu wokusola.”

Kwezombusazwe, uNyathi uthi akakaze awabone amazwe aphetsheya ezohlukumeza uzulu. “AmaWestern powers ngokwazi kwami abakaze bezobiza abantu bebatshele ukuthi tshotshanini or bebize abantu bebatshele ukuthi tshayani abantu, bophani abantu, yekelani ukuya emasimini, yekelani ukuya emafekitali, yekelani ukwenza imisebenzi. So thina abanye angeke sikuvume khonokho ukuthi sirojwe, sidonselwe ingubo emhlweni kuthiwe kasiboni. Siyabona.”

Bakhona-ke abathi okwakhathesi kulabaphathintambo abanothe okwedlula ilizwe abanye belenqwaba yezindlu, amapulazi lamabhazimusi okuyinto engathinti ngitsho amazwe entshonalanga.

UMnu. Nembaware uthi izizalwane zeZimbabwe zikwazi mhlophe ukuthi inkulumo yokuvika ngamazwe angaphandle kayilaqiniso.

“Asizange sibone i America isithi wena unqotshiwe ekhethweni kodwa qhubeka ubusa, kodwa kwenziwe ngabantu abaphakathi eZimbabwe. Asizange sibone iAmerica ibuya izotshaya abantu ngesikhathi seGukurahundi, ngesikhathi soMurambatsvina. Besilama diamonds eMutare, imali ithethwe. Asizange sibone bona oBritain labo America bebuya bethatha leyo mali kodwa lokho bekusenziwa ngabantu abaphakathi kwelizwe.”

AbeZimbabwe laba bathi okungasiza iZimbabwe yikuthi kulandelwe umthetho, kujeziswe abahuquluza inotho bese kufakwa izifiso zikazulu phambili, hatshi ukugcona amazwe aphetsheya ngamaphutha enziwa zinkokheli ngabomo.

Facebook Forum

XS
SM
MD
LG