amalinks wokungena

Breaking News

Iziphepheli zeZimbabwe Ezihlala eBotswana Sezibalekele eSouth Africa


Iziphepheli ezihlala eDukwi Camp kwele Botswana.
Iziphepheli ezihlala eDukwi Camp kwele Botswana.

Kulezizalwane zeZimbabwe ezifika amatshumi amahlanu esezibalekele kwele South Africa ngemva kokuncitshwa ubuphepheli kwele Botswana.

Kodwa abanye abeZimbabwe, abayiziphepheli abahlala enkambeni yeDukwi, sebeqale ukuphindela ekhaya kulandela ukungena kukahulumende omutsha okhokhelwa nguMnu. Emmerson Mnangagwa.

Abanye ababalekayo belokhe bedinga ubuphepheli eBotswana benza lokhu ngomnyaka ka2015.

Ilizwe leBotswana liyalile ukubanikeza ubuphepheli, kodwa umthethwandaba waphezulu, oweHigh Court, kade usanda kunquma ukuthi bakhululwe esitokisini abakade behlala kiso eseCentre For Illegal Immigrants edolobheni leFrancistown.

Ngemva kokuzwa inkululeko sokudlule inyanga ezimbili, uhulumende waphanyeka impikiso kusinqumo somthethwandaba waphezulu, eCourt of Appeal.

Idale limthethwandaba leli lona lithe abadinga ubuphepheli laba kumele baphindele esitokisini seCentre For Illegal Immigrants.

Kade kufanele baphindele eCentre For Illegal Immigrants ngoMgqibelo, kodwa babone kungcono ukubaleka bangene kwele South Africa.

Abanye babo abavela eDRC babalekele eZimbabwe, kukanti abanye baye eNamibia leSouth Africa.

Omunye wabahlala eDukwi Camp kwele Botswana.
Omunye wabahlala eDukwi Camp kwele Botswana.

Igqwetha ebelimela abadinga ubuphepheli laba, uMnu. Morgan Moseki, lithi kusele oyedwa kuphela engowe Zimbabwe, yena othe kafuni ukubalekela emazweni akhethwe ngabanye bakhe.

"Kulomunye ongafuni ukubuyela ekhaya uthi usalinde ilizwe elingamthatha ngaphandle kwele South Africa, Namibia kanye leZimbabwe. Angeke wabuyela eZimbabwe ngoba uthi uvela khona."

Abanye laba abadinga ubuphepheli balabantwana abancane, njalo abakhwabithi ukugcinwa njengabantu abephule umthetho, bona bedinga ubuphepheli.

Kusenjalo, abanye abeZimbabwe abathola ubuphepheli eBotswana kudala, sebeqale ukuphindela ekhaya, kulandela inguquko kahulumende ebekhona kuhulumende eZimbabwe emavikini adluleyo, lapho owaye ngumongameli uMnu. Robert Mugabe osuke esihlalweni, kwangena uMnu. Emmerson Mnangagwa.

Kodwa omunye owafika enkambeni yeziphepheli eyeDukwi Refugee Camp ngo2008, uMnu. Wasu Chibi, uthi noma abantu sebeqale ukuphindela ekhaya, inengi elabalekela udlakela lokhe likhona, lisithi aliyi ndawo.

“Lapha (eDukwi) sihlangene, abanye abayazi into abayibalekelayo ekhaya.

Inengi elabalekela udlakela aliyi ndawo.”

Kuleziphepheli zeZimbabwe ezifika amakhulu ayisikhombisa, 600, enkambeni yeDukwi, inengi labalekela udlakela lokhetho luka2008. Abanye bathi abangeke baphindele ekhaya ngoba abantu ababahlukuluzayo belokhe bekhona ezikhundleni.

XS
SM
MD
LG