amalinks wokungena

Breaking News

Uhulumende kaMnangagwa Ufuna Iziphepheli Ezihlala Kwele Botswana Zibuyele Ekhaya


isiphepheli esihlala eDukwi Refugee Camp kwele Botswana.

Umphathintambo obona ngendaba ezenzakala phakathi kweZimbabwe, uMnu. Obert Mpofu, uthi uzabe ekwele Botswana ngenyanga ezayo ukuzokhulumisana leziphepheli zeZimbabwe ezihlala eDukwi Refugee Camp, ukuzezikhanga ukuthi ziphindele ekhaya.

Kodwa iziphepheli, inengi ezabalekela udlakela lokhetho luka 2008, zithi zifuna uhulumende athembise ukuthi kabasoke behlukuluzwe bengaphindela.

UMpofu uthi unxuswe ngumphathintambo wezomvikela kweleBotswana, uMnu. Shaw Kgathi, ukuthi azokhulumisana leziphepheli ezisenkambeni yeDukwi ngaphandle kweFrancistown, mhla zilitshumi lantathu kuMbimbitho.

UMpofu uthi isikhathi sokuthi iziphepheli zibuyele ekhaya sesitshayile. Uthi akulasizatho sokuthi zihlale kwele Botswana.

Inengi labalekela ukhetho lokudinga umongameli ngomnyaka ka 2008, olwalulodlakela olukhulu lwabulalisa abantu abanengi ikakhulu abasekeli bebandla eliphikisayo le MDC ngesikhathi sowayengumongameli uMnu. Robert Mugabe encintisana lomuyi, uMorgan Tsvangirai.

IBotswana kanye lohlangothi olubona ngeziphepheli enhlanganisweni yomanyano wamazwe womhlaba olwe United Nations High Commission on Refugees zithi akusela sizatho sokuthi iziphepheli zeZimbabwe zibe zilokhe ziseDukwi, ngoba ekhaya sokulokuthula.

Esinye isiphepheli, uMnu. Wasu Chibi, utshele iStudio 7 uthi iBotswana kanye le UNHRC sebefuna bebuyele ekhaya, iziphepheli seziphiwe amafomu ukuthi bagcwalise besitsho ukuthi sebefuna ukubuyela ekhaya.

"I-UN isinike abantu amafomu okuthi sibuyele ekhaya, besilomhlangano lohulumende weBotswana esithi sigcwalise amafomu sibuyele ekhaya."

Inhlanganiso yeUNHCR isehlisa uncedo lwemali elunika amazwe agcina iziphepheli yikho eleBotswana lihlaba umkhosi ukuthi alisoke liqhubeke ligcine abeZimbabwe ngemali ephuma esikhwameni sayo.
UWasu uthi kodwa inkinga yikuthi abangeke babuyele nje ekhaya bengazange bekhulumisane lohulumende weZimbabwe, ngoba basuka ekhaya kungakuhle.

"Thina sithi uhulumende osifunayo kathumele umuntu ngapha ukuze simbuze imibuzo. Sifuna asitshele ukuthi sekuntshintsheni, njalo asithembise ukuthi asisoke sihlukuluzwe. Sihlala sisevalweni ukuthi singabuyiselwa ngenkani."

Esinye isiphepheli esingafisa ukuqanjwa ngegama sithi bazabuyela kanjani ekhaya ngoba nanko abanye batshiselwa imizi ngo 2008.

“Okwamanje siphakathi kwempondo zenyathi, bathi sibuyele ekhaya kodwa imizi seyadilika. Usethembisani uhulumende athi uzasenzela khona. Sicela asiphendule ngoba asikwazi ukuthi sibuyela siqonda ngaphi."

Omunye laye uthi abantu ababebahlukuluza lokhe bekhona ekhaya njalo iZimbabwe ikhangelane lolunye ukhetho olungaziwayo kumbe luzaba lodlakela kumbe hatshi.

"Sasuka singabantu ababalekayo, sesikhangelane lolunye ukhetho, abantu ababelokhe besihlupha lokhe bekhona. Umongameli angaze azame ukusipha ithemba, siyesaba ngoba sikhangelane lokhetho."

UMpofu ukhangelelwe ukuthi akhulumisane lazo iziphepheli phezu kwendaba zonke lezi, njalo yena uqinisa elokuthi sokuyiZimbabwe entsha, abantu kumele bephenduke bezoncedisa ukwakha ilizwe. Iziphepheli zeZimbabwe zibikwa zimele zibe seziphindele ekhaya ekupheleni kukaMpalakazi lonyaka.

Udaba Esilethulelwe NguMartin Ngwenya
please wait

No media source currently available

0:00 0:03:31 0:00

Facebook Forum

XS
SM
MD
LG