Abenhlanganiso emela izisebenzi zikahulumende eye Apex Council bangene umhlangano wokuxoxisana ngodaba lweholo phansi kohlelo lwe Negotiating Council kodwa akukho okubambekayo okuphume kiwo njengoba izisesebenzi zisithi kazemukeli ezikunikezwa nguhulumende.
Emhlanganweni lentathelizindaba ngemva komhlangano wabo lomqhatshi owenzelwe emahofisini e NSSA umgcinisihlalo we Apex Council, uNkosikazi Cecilia Alexander, uveze ukuba uhulumende wengezelelel imali akade ebanikeza yona ukuze basizakale ekuphileni eye Cost Of Living Adjustment –isukela kuzigidi ezilikhulu lamatshumi ayisithupha zamadola - $160 million isiya kuzigidi ezingamakhulu amathathu zamadola - $300 Million.
Kodwa bathi akusikho akade bekukhangelele.
Abe Apex Council bathi imali le iyingcosana kodwa bemukele abayiphiwa phansi kohlelo olwe Cushioning Allowance nguMongameli Emmerson Mnangagwa athe basizakale ngayo kusukela kuyonale inyanga kuze kuyefika uMbimbitho.
Bathi uhulumende wenze kuhle ukubonisa ukuba uyananzelele ubunzima izisebenzi zakhe zibhekane lazo lanxa besithi inlutshwana kakhulu.
UMnu. Nkosikhona Dibidi, isakhamuzi seHarare, uthi lanxa elincoma lelinyathelo elithethwe nguhulumende kumele akhangelisise akutholisa izisebenzi zakhe kube ngokuhambelana lesimo elizweni.
UDibidi uthi laleyo mali okuthiwa izophiwa izisebenzi okwenyanga ezintathu ingasoke yasiza lutho ngoba inlutshwana kakhulu.
Abe Apex Council bathi isaziso sokukhalala umsebenzi siphela mhlaka 25 Zibandlela. Lesi saziso senziwe abenhlanganiso yezisebenzi zonke eye Zimbabwe Congress of Trade Unions bengakaqoqi ukutshengisela kwabantu ngokungayi emsebenzini kungakenziwa.
Obekhokhela emhlanganweni ngoLwesihlanu emele uhulumende uMnu. VaBritto Chimbunde, walile ukukhulumisana lentathelizindaba esithi akavunyelwa ukwenza lokho.
Izisebenzi zikahulumende zithi zifuna ukuba ohola imali enlutshwana athole inkulungwane lamakhulu ayisikhombisa zamadola $1,700 ngenyanga.
Kusenjalo, abenhlanganiso yomanyano wamazwe awe Europe eye European Union basole ukusetshenziswa kwamandla okudlulise amalawulo ngabezomvikela ngesikhathi uzulu etshengisela okuqoqwe ngabe ZCTU.
Abe EU bathi uhulumende weZimbabwe kumele enze inhlolisiso phezu kokutshaywa kukazulu ngesikhathi sokutshengisela kanye lodaba lokuvalwa kobulembu be internet wamagagasi nguhulumende.
Bathi kumele kue lokukhulumisana phakathi kukahulumende lozulu kuguqulwe imithetho encindezela abantu besithi udaba lweZimbabwe lokukhankasela osomabhizimusi ukuba bazesungula amabhizimusi abo kulelo kungaphumelela kuphela nxa lokhu kuthe kwenziwa.
