amalinks wokungena

Breaking News

Izisebenzi Zikahulumende Zitshengisela Emigwaqweni Zikhonona Ngeholo Eliphansi


Izisebenzi zitshengisela emigwaqweni eHarare.
Izisebenzi zitshengisela emigwaqweni eHarare.

Abenhlanganiso emela izisebenzi zikahulumende eye Apex Council ngoLwesibili batshengisele emigwaqweni bekhonona ngeholo abathi lincane kakhulu.

Bathi abasenelisi ukuziphilisa ngeholo leli. Izisebenzi lezi zithi zifuna iholo likhuphulwe lifike kunkulungwane ezine zamadola, okuyisilinganiso seholo ezazilithola kuMfumfu ngomnyaka odluleyo.

Izisebenzi lezi bezitshengisela ngokufola emigwaqweni eHarare, zicula njalo zithwele amabhakane aveza ukukhonona kwabo.

Zifike emawofisini kamphathintambo wezisebenzi zika Hulumende eKaguvi Building lapho ezifike zanikeza umsekeli kamphathintambo uMnu. Lovemore Matuke izikhalazo zazo zaqhubeka zaya emahofisini kampathintambo wezemali uMnu. Mthuli Ncube.

Isikhulumeli se Apex Council uMnu. George Mushipe uthe ukuze iholo labo lilingane lamadola eMelika phose amakhulu amahlanu-US$475, kuzamele kusetshenziswe isilinganiso sokutshintsha imali somkhambo wamabhanga eseInterbank ese dola elilodwa leMelika elilingana lamadola eRTGS ayisitshiyagalombili (1us$ : ZW$ 8).

Lokhu kutsho ukuthi imali ezaholwa yisisebenzi sikahulumende esiphansi kufanele ifike inkulungwane ezine zedola leZimbabwe(ZW$4,000)

“Thina sithi sifuna iholo lethu liyisqathaniso seUS$470 sisebenzisa irate le interbank. Asisoze sikhangele irate lomsika wensitha kodwa sithi ele Interbank. Kungenziwa njalo siyabe sesibuyelile kuholo lethu likamhla ka 1 Mfumfu kumnyaka odluleyo yikho esikucelayo kuphela.”

Kodwa ezinye izisebenzi zithi i$4,000 ayeneli ngoba intengo yempahla etshiyeneyo elizweni iqhonge kabi.

Unkosikazi Nozipho Dube, ongumbalisi, uthe osekubhidlize iholo yikuthi abanini bezitolo sebethengisa beqathanisa intengo yedola leZimbabwe leleMelika kulandela ukwaliswa kokuthengiselana ngedola leMelika elizweni.

“Mina njengombalisi ngibona angani i4,000 bond le ayiseneli, sikhangele indlela izinto ezikhwele ngayo phandle. Intengo yamafutha ikhwelile kusitsho intengo yamabhasi layo isikhweziwe, kuthi sihambe sisiya emisebenzini labantwana khonapho liyabe ligada ibhasi. Imali yesikolo ikhwelile, ama rents akhwelile kanye lokudla so I$4,000 incinyane kodwa-ke kulapho esiqalela khona njengoba uhulumende engafuni ukusiholisa, ngabe bayasingezelela basinike imali engcono. Intengo ziqonge kabi”

Lokhu kuza ngemva kokuba umhlangano phakathi kwenkokheli zezisebenzi zikahulumende lohulumende okade ufanele uqhutshwe kuviki edluleyo wehluleke ukuqhutshwa ngoMvulo ngemva kokuba abamele uhulumende behlulekile ukubuya kulo umhlangano.

Kodwa unobhala wenhlanganiso emela izisebenzi eye Zimbabwe Congress of Trade Unions (ZCTU), uMnu. Japhet Moyo, uthe ukwenza kukahulumende kuveza ukungazinikeli kwakhe ekukhulumisaneni lezisebenzi zakhe.

UMatuke utshele inkokheli zezisebenzi ukuthi uhulumende uphatheke kakhulu ekulungiseni inkinga izisebenzi zakhe ezibhekane lazo.

Uthe ulethemba lokuthi inkulumo zizenzakala emalangeni njalo zizaletha impumela ezathabisa izisebenzi.

Udaba Esilethulelwe NguGibson Bhebhe
please wait

No media source currently available

0:00 0:04:50 0:00

XS
SM
MD
LG