Izisebenzi zithi ukuvalwa kwamankampani kanye lenhlelo zokuziphilisa ezitshiyeneyo ngenxa yomkhuhlane weCovid-19 sokuzidalele ubunzima obukhulu empilweni ngoba kazisenelisi ukuphandela izimuli.
Ekuvalweni kwelizwe kumaviki amathathu edluleyo umphathintambo obona ngokuphathisa abaswelayo uMnu Paul Mavima uthembise ukuthi uhulumende uzaqhubeka encedisa abaphanjaniselwe impilo yi-lockdown.
Kodwa abanengi abagoqela abaphila ngokuzisebenza bephansi kwenhlanganiso yeBulawayo Vendors and Traders Association bathi akulasizo asebelutholile.
Isiphathamandla salinhlanganiso uMnu Aleck Ndlovu uthi lanxa okuyimadlana abakuphiwe kuqala kungabasizanga okuya ngaphi, sebelobele uhulumende incwadi becela njalo olunye usizo ngoba umangoye eselala eziko.
“Abantu baphiwa $600 RTGs njalo kwakhethwa abantu, akuzange kuphiwe bonke; sahambisa uluhlu lwamabizo amalunga ethu kodwa abazange baphiwe bonke,” kutsho uMnu Ndlovu.
“Yimali engazange isiphathise okuya ngaphi kithi abaphila ngokuzisebenza. Ngakho, sezibhalele uhulumende sicela usizo lwemali ngoba sithwele nzima.”
Amazwi kaNdlovu agcizelelwe ngunobhala jikelele wenhlanganiso yezisebenzi iZCTU uMnu Japhet Moyo, othi ukuvalwa kwelizwe kutshiye izisebenzi zisesimeni esibi kakhulu.
“Sesibone izisebeni ezinengi esezilahlekelwe liholo ngoba abaqhatshi abanengi ababhadali ngalesisikhathi se-lockdown,” kutsho uMnu Moyo.
Kusiyafika inyanga kaMpalakazi nyakenye uhulumende uthi ubesephathise abantu abangu276,000 ngemali phansi kohlelo lokuncedisa abathinteke kubi yikuvalwa kwelizwe kulockdown yakuqala.
UMoyo uthi lanxa bekulokukhulumisana phakathi kukahulumende lenhlanganiso zezisebenzi nyakenye ngohlelo lokuncedisa uzulu, khathesi abazi lokuthi kwenzakalani lokuthi ngobani abazaphiwa imali.
Lanxa uhulumende ehlezi ekhala ngokubhoboka kwezikhwama, ingcwethi kwezenotho uMnu Reggie Shoko uthi zinengi indlela uhulumende angaphathisa ngazo abantu ezingadingi ukuthi akhiphe imali esikhwameni.
“Kwesinye isikhathi ngeke sikhangelele ukuthi uhulumende akhiphe imali kuphela,” uMnu Shoko utshele iStudio 7.
“Kukhona okunye angakwenza okufana lokuthi abakumpentsheni kumbe abathwele nzima nje ku-economy, behliselwe indleko abazibhadala ezifana lama-rates lemithelo ukuze lokho okulutshwana abakutholayo kubaphathise.”
Asenelisanga ukukhuluma loMavima ngoba ucingo lwakhe belungabambeki.
