amalinks wokungena

Breaking News

Izisebenzi Zitshengisa Ukungajabuleli Uhlelo Lukahulumende olweZimAsset


Izisebenzi zithi kazemukeli uhlelo lukahulumende weZanu PF lokuthuthukisa umnotho welizwe olwe ZIMASET ngoba akuzange kube lokuxoxisana lozulu lungakasungulwa. Lokhu kuphume ngesikhathi eleZimbabwe limanyene lamanye amazwe womhlaba ekunanzeni usuku oluqakathekisa okwenziwa yizisebenzi olwe International Labour Day.

Inkokheli emkhosini owenzelwe enkundleni ye Gwanzura Stadium, okubuthane izisebenzi ezisenhlanganisweni eziphansi kwe ZCTU ekhokhelwa ngumnumzana George Nkiwane, zigcizelele ukuqakatheka kokudinga indlela zokulungisisa isimo sezisebenzi elizweni esiqhubeka sisiba sibi nxa kuqathaniswa lalapho uhulumende womanyano esembusweni.

Uzulu ukhanye engajabuliswa yinkulumo kamnumzana Francis Mafuratidze umqondisi wohlangothi lwezisebenzi oze emele umphathintambo wezisebenzi umnumzana Nicholas Goche.

Wehlulekile u Mafuratidze ukuqubekela phambili ukufunda umbiko kaGoche ngoba izisebenzi zingavumelani lenkulumo yakhe yokukhankasela uhlelo lweZIMASET.

Inkokheli yelinye lamacele eMDC egoqela umnumzana Morgan Tsvangirayi yemukelwe ngenjabulo enkulu yilezi zisebenzi ngesikhathi ingena enkundleni ye Gwanzura emkhosini lo, ezinye zazo zembethe impahla yebandla leli.

UTsvangirayi owake waba ngunobhala jikelele walenhlanganiso kungakasungulwa ibandla leMDC, laye uqinise elokuthi izisebenzi kumele zithathe amanyathelo ukulungisisa isimo esibi ezikiso.

AbeZCTU bathi isimo sezisebenzi kasisihle ma kuqathaniswa lalapho uhulumende womanyano esabusa bethi ngaleso sikhathi kuke kwaba lokuzinza kwezomnotho okunganeno, amankampani angani ayavuka lanxa ebeyincosana izinto zike zaba ngconywana kwaphazamiseka ngesikhathi kulungiselelwa ukhetho lwanyakenye.

Unobhala jikelele we ZCTU umnumzana Japhet Moyo ugcizelele umbono othi makudingwe indlela yokutshengisela ukukhonona kwazo njengoba isimo sezisebenzi kulezi nsuku singasihle ngakho makubuyelwe kundlela zokutshengisela abekade zisetshenziswa eminyakeni yangemuva yokudinga ukulalelwa nguhulumende njengoba ethi kuyizo uhulumende azizwayo.

U Moyo ukhuthaza izisebenzi ezilokhe zisemisebenzini ukuba zimanyane ngokungena kuma Unions ukuze banelise ukuyilwa impi bendawonye phezu kokuthuthukiswa kwezomnotho.

Uqhubeke ethi ukuxokozela okwenzakala emabandleni ezombusazwe wonke abalisa ele MDC kanye lele Zanu PF, phezu kwendaba zobukhokheli kungekuhle ngoba kuphazamisa lezisebenzi ekuthini ziphetha zilandela isibonelo sinye.

Inkokheli zama Union abekulomkhosi zitshengise ukukhathazeka phezu kokwenza kukahulumende kokufuna ukuhlawulisa umthelo abaphila ngemisebenzi yezandla lokuthengithengisa impahla eyehlukeneyo, kodwa bengabantu banye abahlezi behlukuluzwa bethathelwa loba ukubhidlizelwa impahla yabo.
Bathi isimanga yikuba laba bantu bavele behlawuliswa imithelo eminenginengi okubalisa lapho bengena lempahla ivela kwamanye amazwe yokuzathengisa eZimbabwe kanye lalapho abathengisela khona.

IStudio Seven ikhulumisane lenkokheli zama Unions ebezikulomkhosi wokunanza usuku lwezisebenzi ezitshengise ukudana phezu kokwenza kukahulumende lokhu.

Umnumzana Elija Emmanuel Mutemeri ungumcebisi kundaba zalabo abaphatha imisebenzi yezandla – Zimbabwe Chamber of Informal Economy Association ngaphansi kwenhlanganiso ye ZCTU.

Abe ZCTU laba bathi kunje inani labalahlekelwa yimisebenzi bebanengi kulanyakenye kusiya ngesilinganiso abasiphiwa ngabenhlanganiso elondoloza izimali zempetsheni yezisebenzi eye NSSA abathi selehle ngenkulungwane ezedlula ezilikhulu - 100 – 000.

Kuthi bona njengenhlangiso yezisebenzi sebelahlekelwe ngamalunga edlula inkulungwane eziyisitshiyagalolunye ngemva kokulahlekelwa yimisebenzi lapho amankampani evalwa.

Abenhlanganiso ye ZCTU le bathi basungula isicoco esithiwa ngese Morgan Tsvangirayi Worker of the Year Award kusisebezni esikhethwa ukuba yiso esisebenze kanzima kumnyaka owedlule.

Lesi sicoco semali eyinkulungwane yamadola akweleMelika – US$1000-00,salonyaka sinikezwe umgcinisihlalo wesigaba se North Eastern region enhlanganisweni le mnumzana Jokonia Maopa .

Icele le ZCTU elikhokhelwa ngumnumzana Lovemore Matombo obekumele liqhube umkhosi ofanayo enkundleni ye National Sports Stadium kalisavunyelwanga ukwenze njalo ngoba bengatholanga imvumo emapholiseni esithi ngenye yezindawo eziqhutshelwa imikhosi yeHarare International Festival for the Arts ( HIFA ).
XS
SM
MD
LG