amalinks wokungena

Uzulu Uyithola Ingamadola Kumbe Ama Bond Notes Imali Ethunyezelwa Ekhaya?

  • Martin Ngwenya

Imali yohlobo lwama bond notes eqalise ukusebenza ngoMvulo.

Abakubhizimusi lokuthumeza imali isuka eBotswana ingena eZimbabwe bathi abalasabelo sokuthi imali ifika iyiluphi uhlobo eZimbabwe.

Lokhu kulandela ukwethulwa kokusetshenziswa kwemali yephepha yohlobo lwama bond notes eZimbabwe ekupheleni kukaLwezi.

Inengi selitshengise ukungathakazeleli loba ukuthemba ama bond notes la, phezu kweyinye imihlobo yemali ikakhulu amadola eMelika.

Izisebenzi kumabhizimusi okuthumela kumbe ukwamukela imali afana leWestern Union kanye leMoney Gram batshele iStudio 7 ukuthi abalamandla wokuthi labo abathunyelwa imali bayithola ingaluphi uhlobo.

Kodwa bathi abathumelayo imali bayatshelwa ukuthi ifika ingamadola eMelika.

Ngesikhathi iStudio 7 isiyadingisisa emawofisini aweMoney Gram eGaborone, esinye isisebenzi sithe abathumela imali eZimbabwe kumele baqale bedingisise lebhanga kumbe indawo lapho abazakwamukela khona imali, ukuthi izafika iluhlobo bani.

Lesi yiso isizatho esesibangele ukuthi abafana loNkosikazi Mary Ndlela babuyele ekuthumeleni ngabo malayitsha kumbe amabhasi aqonda ekhaya.

“Sekungcono ngaleyo ndlela ngoba ngiyazi ukuthi imali izafika iluhlobo engiyithumele ngayo.”

UNdlela uqhubeke esithi bangeke behugwe yimbasela esifakwa ngamakampani amanye okuthumela imali. Abamukela imali baphiwa okuhlanu ekhulwini lalokho abakuthunyelweyo kuyimbasela kodwa engama bond notes.

"Lokhu akungeke kungihuge, ngifuna abantwabami bathole imali masinya njalo ingayisiwo mabond notes."

Abanye abamabhasi kanye labo malayitsha bahlawulisa itshumi ekhulwini lemali ethunyelwayo. Okwakhathesi, abamukela imali bathi basayithola kuhle ingamadola eMelika hatshi amabond notes.

Imbasela yiyo kuphela ephiwa ingama bond notes.

XS
SM
MD
LG