amalinks wokungena

Breaking News

Ibandla leANC LakweleSouth Africa Liqala Umhlangano Wokukhetha Inkokheli


Umhlangano oweANC Congress

Ibandla elibusayo kwele South Africa ele African National Congress ngoMgqibelo liqala umhlangano omkhulu wokukhetha inkokheli entsha egoqela umkhokheli walo ozakuba ngumongameli welizwe ngemva kokhetho luka 2019.

AbeZimbabwe abasebenza lokuhlala kwele South Africa bathi lakubo kuqakatheke kakhulu ukwazi ukuthi ngubani ozathatha intambo zombuso kulelozwe.

Umhlangano weANC Congress yakwele South Africa
Umhlangano weANC Congress yakwele South Africa

Amalunga ebandla le ANC aseqalisile ukufika eNasrec eJohannesburg emhlanganweni wamalanga amathathu wokukhetha inkokheli yalelibandla.

Amehlo wonke athe nhlo kumsekeli kamongameli uMnumnzana Cyril Ramaphosa lowayengumgcinisihlalo we African Union Commission uNkosazana Dlamini-Zuma okuyibo abahamba phambili kulabo abancintisa esikhundleni sokukhokhela leli bandla.

Ukosikazi Nkosazana Dlamini-Zuma lomsekeli kamongameli Umnu. Cyril Ramaphosa
Ukosikazi Nkosazana Dlamini-Zuma lomsekeli kamongameli Umnu. Cyril Ramaphosa

Okuqakathekileyo yikuthi ozanqoba phakathi kwababili laba nguye ozakuba ngumongameli welizwe ngemva kokhetho luka2019 okukhangelelwe ukuthi iANC yiyo ezangqoba.

Ibandla leAfrican National Congress likhangelelwe ukuthi lizakwenza umhlangano walo omkhulu wokukhetha inkokheli ngempelaviki.
Ibandla leAfrican National Congress likhangelelwe ukuthi lizakwenza umhlangano walo omkhulu wokukhetha inkokheli ngempelaviki.

Ingcitshi kwezombusazwe uSkhwicamfundo Susan Booysen, uthi kukhanya zindala zombili.

“Ngicabanga ukuthi kuzakuba ngutshiki lobhanqa kumbe ukuthi unkosazana Dlamini-Zuma nguye ozanqoba kodwa umehluko kuzakuba linani elincane kakhulu.”

Izizalwane zeZimbabwe ezihlala kwele South Africa zithi lobanje kuthiwa eyomdeni kayingenwa, le bazayingena ngoba ukuthi ngubani obusayo kuyabathinta labo kakhulu.

UNkosazana Ntandoyenkosi Moyo, ohlala eJohannesburg, uthi ukuhlala kwabo eSouth Africa kuya ngohulumende ophetheyo lomkhokheli wakhe.

UMnumnzana Innocent Ndlovu yena uthi kungangena umongameli ozabhidliza umnotho welizwe, inengi labeZimbabwe labo bangazibona sebengomatshayinyoka.

“Ama investors uma kungakhethwa upresident abangamfuniyo bona kumbe abambona engekho engalunganga balakho ukuthi basuse imali yabo elizweni abantu abasebenza khona balahlekelwe yimisebenzi.”

Kanti-ke uMnumnzana Lungisani Mabuya uthi njengezizalwane zeZimbabwe bayibheke ngabomvu impumela yalo umhlangano.

Besicelanje mhlawumbe ukuthi kungahamba kahle konkenje. Ophetheyo uphethe odliwayo udliwe akemukele. Silethemba lokuthi konke esikucelayo elizweni laseNingizimu Africa siyakuphiwa kahle njengoba bekuphethe ubaba uJacob Zuma.”

Ingcwethi zombusazwe zithi uMnumnzana Cyril Ramaphosa nxa engakhethwa ulakho ukukhanga abezamabhizimusi njengoba ekhanya esazi ngezomnotho futhi eyizonda inkohlakalo. Ngakolunye uhlangothi bathi ukunqoba kukaNkosazana Dlamini-Zuma kungahle kulifake enkingeni ilizwe njengoba kukhanya evumelana lokunengi obekusenziwa ngumongameli Zuma obese kuwulalise ngogedla umnotho welizwe.

Udaba lomhlangano weANC Congress siluphiwa nguBenedict Nhlapho
please wait

No media source currently available

0:00 0:02:28 0:00

Facebook Forum

XS
SM
MD
LG