amalinks wokungena

Breaking News

Izizalwane zeZimbabwe Ezibiselwa Ekhaya Zeqa Emoteni Yamapholisa, Zilimala Kabuhlungu


Amapholisa akwele Botswana ...

Kulabantu abane abavela kwele Zimbabwe abalimele kakubi ngemva kokweqa emoteni yamapholisa kwele Botswana ngesikhathi besiwa enkambeni kulungiselelwa ukuthi babuyiselwe ekhaya.

Amapholisa emangweni weTsetsebjwe, duze lomngcele weZimbabwe, bathiabantu laba bebengafuni ukuya enkambeni lapho abakade bezaphindiselwa khona ekhaya.

Ababili phakathi kwabane laba lokhe bengabonakali kukanti abanye ababili batholakele emlageni lapho okufuywa khona inkomo, belimele kakubi.

Kukhanya kade besebenza emlageni le beselusa inkomo kodwa bengalamaphepha okuhlala eBotswana okusemthethweni.

UMnu. Nzanani Moyo kanye loNhloniphani Ncube bahanjiswe esibhedlela. UMoyo uqamuke unyawo lesandla kwathi uNcube waqamuke unyawo.

Kutholakale ukuthi sebele viki bengakaze bethole uncedo lokwelatshwa, bezihlalele emlageni besesaba ukuya esibhedlela ngoba bengela maphepha abanikeza imvumo yokuhlala kumbe ukusebenza kweleBotswana.

Isehlakalo lesi sitshiye abeZimbabwe abahlala kweleBotswana, abafana loMnu. Andreas Sibanda bemangele ukuthi umuntu angazimisela ukufaka impilo yakhe engozini kulokuthi abuyiselwe ekhaya.

“Umumo welizwe usekhatshana lokuthi ulunge, ungabona indoda izimisela ukweqa imota ihamba, yisetshengiselo sokuthi, hatshi kusekhatshana lokulunga.”

UNkosikazi Emily Tshuma laye uthi okwenziwe yilababantu abeqe imota ihamba ngumlayezo wokuthi kungangcono bedubeke kweleBotswana, hatshi ekhaya lapho umumo ongakalungi khona.

“Lokhu kutshengisa ukuthi ekhaya into azikalungi uma abantu beseqa emoteni ihamba. Kunzima ekhaya into zime manzonzo, abongikazi khathesi baxotshiwe, ngcono basiyekele sihlale khonapha kulokugijima besithi sibuyele ekhaya.”

Isehlakalo lesi sifana lokukhafulela amathe amazwi kamongameli Emmerson Mnangagwa, yena owayeseBotswana ngoNhlolanja encenga abeZimbabwe ukuthi baphindele ekhaya bayekwakha ilizwe.

Noma nje wangena kulamathemba aphezulu, uMnangagwa kakagcwalisi izifiso zikazulu, inengi seliqala ukudangala, amathuba emsebenzi elokhe engabonakali.

Kusenjalo amapholisa esigabeni seTsetsebjwe athi lokhe ethwele amagabha avuzayo ngabeZimbabwe abangena eBotswana okungekho emthethweni.

Usibalokhulu wamapholisa eTsetsebjwe, uMnu. Amos Kekgathetse, uthi babopha abeZimbabwe njalo nje kodwa baqhubeka beseqa umngcele okungekho emthethweni, ngobu thumu thumu.

Uthi babopha abaphakathi kwetshumi lamatshumi amabili lanhlanu ngelanga, kodwa akuncedi, njalo isimo sinzima ngokuthi akulacingo phakathi kweZimbabwe leBotswana endaweni yakhona.

Udaba Esilethulelwe NguMartin Ngwenya
please wait

No media source currently available

0:00 0:02:45 0:00

Facebook Forum

XS
SM
MD
LG