amalinks wokungena

Breaking News

Izizalwane zeZimbabwe Ezihlala eBotswana Zibanjwa Zilama Passports Adingwa Ngundlu


Adingwa ngamehlo abomvu ama passports elizwe leBotswana.

Izizalwane zeZimbabwe ziqhubeka zibanjwa ngamapholisa kwele Botswana zizama ukuthola izithupha kanye lencwadi zokuhambisa zaku lelolizwe ngesikhathi inengi lizama ukubalekela udubo ekhaya.

Amapholisa kwele Botswana athi akhathazekile ngokukhuphuka kwenani labantu beZimbabwe asebesetheswa amacala okutholakala belezithupha kanye lencwadi zokuhambisa ezeBotswana bona bengelalungelo lokuba lazo lezi ncwadi.

Lokhu kulandela ukugwetshwa kuka Mnu. Lizwe Ngwenya emthethwandaba weFrancistown kuyonale iviki ngemva kokuba etholakale elesithupha lephasiphothi eyeBotswana.

Amapholisa athi asebambe amacala aphose angamatshumi amabili lonyaka, kubanjwe lomunye oweBotswana oncedisa abeZimbabwe ukuthola izithupha lama phasiphothi.

UNgwenya utholakale elesithupha kanye le phasiphothi ngemva kokusebenzisa ibizo lowe Botswana uKgakgamatso Vain.

Uvumile emthethwandaba ukuthi wayesazi ukuthi akwenzayo kulicala. Uzagwetshwa mhlaka 8 ngoLwezi lonyaka.

Omunye oweBotswana laye umiswe phambi kukamantshi esetheswa icala lokuncedisa abeZimbabwe ukuthola amaphepha la womabili.

UNkosazana Sekane Mabutho ubikwa eseleminyaka engamatshumi encedisa abeZimbabwe ukuthola incwadi zokuhambisa kanye lezithupha zeBotswana.

Abanye abeZimbabwe kwele Botswana abafana lo Mnu. Amon Ndlovu bathi lesi yisitshengiselo sokuthi abantu bafisa kangakanani ukugeza ukuba ngabe Zimbabwe ngenxa yesimo esilukhuni ekhaya.

"Yikuhlupheka osekufake abantu kulesisimo. Thina sikwazi ukuthi kudala abantu babelwela ukungena eZimbabwe kodwa konke lokhu sokuntshintshile."

UNkosikazi Senzeni Moyo yena uthi ukuba ngowe Zimbabwe elizweni elifana leBotswana kunzima yikho abantu befisa ukuthatha izithupha zeBotswana.

‘Kunzima ukuthola amaphepha okuhlala lokusebenza eBotswana, ngakho-ke labo asebehlale isikhathi eside bacina bebona kungcono ukuzama ngundlu ukuthola izithupha zeBotswana. Kutsho ukuthi okwe Zimbabwe sekubehlule."

Amapholisa axwayise kakhulu izizalwane zeBotswana ukuthi ziyekele ukuncedisa abeZimbabwe ukuthola ingwalo ezifana lezithupha ngoba kungaphandle komthetho.

AbeZimbabwe babikwa behlawula imali ephezulu edlula inkulungwane ezilitshumi zamapula (P10,000) ukuthola lezingwalo.

Facebook Forum

XS
SM
MD
LG