Izizalwane zeZimbabwe ezisebenzela kweleSouth Africa ebezivakatshele ekhaya ngekhefu lekhisimusi seziveze ukudana ngomumo wezomnotho wakuleli zisithi bezikhangelele impilo engcono ngemva kokhetho
Inengi elixoxe leStudio 7 lithi lize ekhaya lilethemba lokuthi sokungcono njengoba kusanda ukuqhutshwa ukhetho kodwa limangele ngesimo somnotho wakuleli esesidale ukuqonga kwentengo yempahla kanye lokusilela kwezinye.
UNkosazana Saneliso Dube oweNyandeni eGwanda uthi ngempela umumo wezomnotho awujabulisi.
UMnu. Qhubani Moyo uthi ubekhangelele ukuthi bathole sokungcono lapha ekhaya kodwa umangele eswela lenamnende ezitolo ngesikhathi sekhisimusi.
UMnu. Ndabezinhle Dube laye uthi kuyadingeka ukuthi uhulumende wakuleli asebenze ngamandla njalo bazimisele ukuphenduka ekhaya kungalunga.
Isakhamuzi seNyandeni uMnu. Abel Moyo uthi uhulumende kumele avule amathuba omsebenzi ukuze umnotho wakuleli uphakame.
Kusenjalo, inengi emakhaya lonyaka libhekana lendlala embi kakhulu ngenxa yokungani kuhle kwezulu kulesisabelo.
Inengi lezakhamizi liqale ukulima kunsukwana ezedlulileyo kodwa ithemba lesivuno esihle selitshabalele njalo likhathaza uhulumende ukuthi asize ngokudla.
uNkosikazi Febbie Dube ohlala eSinampande eBinga uthi inengi elihlala emaphandleni alisenelisi ukuqhuba inhlelo zokuziphilisa.