amalinks wokungena

Izizalwane zeZimbabwe Ezihlala eSouth Africa Zihlenga Abathwele Nzima Ekhaya

  • Bennedict Nhlapho

Kukhona njalo ezinye inhlanganiso ezinceda uzulu eZimbabwe.

Izizalwane zeZimbabwe kweleSouth Africa sezisungule uhlelo lokuqoqa usizo lokuncenda amakhulu abantu beTsholotsho abalezindlu zabo lamabele emasimini okubhidlizwe lizulu lezikhukhula kunsukwana ezisanda kwedlula.

Ikhomiti ekhethelwe ukuqoqa lolusiso isiqalisile ukwemukela imphahla zokugqoka, ingubo, ama computer, izingwalo kanye lemali okuzakuyaphiwa labo bantu kusukela ngempelaviki ezayo.

Akhala ezimathonsi amakhulu ezakhamizi zaseTsholotsho ngemva kokuba izikhukhula zezulu likaDineo zibhidlize izindlu, izifuyo amasimo kanye lakho konke okuphilisa umuntu basala bengelalutho.

Lokhu sokulethe isihelo esikhulu kuzakhamizi zeZimbabwe ezisebenza kweleSouth Africa osekwenze zasungula umkhankaso wokudingela laba bathu usizo.

Njengoba inengi lalezi zakhamizi zihlala ematendeni lezindlini zokufundela esikolo koSipepa High School, omunye wabasungule lumkhankaso uMgcinisihlalo wenhlanganiso yeZimbabwe Community in South Africa uMnumnzana Ngqabutho Mabhena uthi bakubonile ukuthi ukuzwelana lalaba bantu bengenzi luthi akusizi.

“Sihlangeneke sakhulumisana savumelana ukuthi kufanele sisungule inhlangano eyesikhatshana esiyibiza sithi yi Tsholotsho Disaster Committeee lapho abantu ababhidlikelwe yimizi yabo, abantu abasuswe emzini yabo bencediswa sekugcwele amanzi bayahlaliswa esikolo.”

TRUST FUND

Omunye njalo wabafuqa lomkhankaso uMnumnzana Thembani Ncube uthi, le akusinto engamelela ukwenziwa ngomnyaka ozayo ngoba sikhulumanje abantu basemqandweni izisu zikhala umoya.

“Kuvunyelwene ukuthi kuzoba lempahla ezizaphiwa abantu izizathunyezwa ngoMgqibelo kubesokuqalisa isikhwama esibizwa ngokuthi yiTrust Fund. Leyo Trust Fund izabe ikhangele ingozi ezinjengalezi ezenzakala eZimbabwe."

UMnumnzana Joyful Ncube uthi uthokoziswa yikuthi zikhona izizalwane zeZimbabwe esezihle zasukumela phezulu.

“Kukhona impahla esezikhitshiwe esezikhona. Bakhona abathembisa ukuthi basazoletha. Zikhona indawo ezimbili ukuthi nxa umuntu elempahla afuna ukuzidonator, impahla zokugqoka, ama uniform abantwana esikolo, amabhola loba yini, Emaphalala Square eBerea then kuGumede eYeoville abanengi bayakwazi.”

UMabhena uthi baqoqa yiloba yini efunekayo empilweni yomuntu ngoba lezi zakhamizi ziselenje lebezikugqokile.

“Esikucela kumphakathi yikuthi abalethe impahla abangasazigqokiyo. Abalemali bahambe futhi bayethenga impahla ezitolo, ingubo bathenge futhi lamabhuku angancedisa abantwana esikolo ukwenzela ukuthi sikuthumele ekhaya. Sicabanga ukuthi impahla singaqala ukuzithumela nge weekend le ezayo.”

UMKHANKASO OMUNYE

UMnumnzana Thembani Ncube uthi, lobanje uhulumende laye esiza ngokuthile, izandla zakhe zifitshane yikho becela uzulu wonke jikelele ukuthi aphathise.

“Sonke siyazi ukuthi uhulumende akakhoni ukuthi asiphathise, laye ulengxaki la axakeke khona. Esikucelayo yikuthi izakhamizi iloba yi T-shirt, I loba yi R1, iloba yi $1 ize kuTrust Fund yethu, siyakhona ukuthi sisizaneni siyizakhamuzi zaseZimbabwe.”

Kusenjalo iWofisi yesabelo seMatabeleland North layo isiqale umkhankaso ocela usizo olufanayo kulabo abaseZimbabwe. AbaseZimbabwe abaloncedo loluda bakhuthazwa ukuthi baluse emahofisini kahulumende eMhlahlandlela koBulawayo, kumbe emahofisini kasikomisthi eTsholotsho loba esikolo koSipepa High School lapho okubuthene khona lezi imuli.

Facebook Forum

XS
SM
MD
LG