amalinks wokungena

'Benza Kahle eSouth Africa Abatshengisela Ezitaladini Besola uZuma'

  • Bennedict Nhlapho

Abanye abatshengisele eSouth Africa besola izenzo zikaMongameli Jacob Zuma.

Izizalwane zeZimbabwe kwele South Africa sezincome ukumanyana kwenhlanganiso zikazulu, amabandla ezokholo lawezombusazwe kwele South Africa emizameni yokubamba ngamandla uhulumende obusayo ukuthi aqakathekise izifiso zikazulu.

Amaqula la azamanyana ngoLwesihlanu ekutshengiseleni elizweni jikelele besithi uMongameli Jacob Zuma akehle esihlalweni ngemva kwezinqumo asanda kuzenza esezitshiye umnotho welizwe usengozini yokubhidlika. UBenedict Nhlapho usipha loludaba eseJohannesburg kweleSouth Africa.

Isenzo sikaZuma sokuxotsha umphathintambo wezemali, uMnu. Pravin Gordhan, sesidale ingxabangxoza kwezomnotho kwabangela ukuthi amaqembu enhlanganiso zikazulu, amabandla ezokholo lawezombusazwe amanyane efuna ukuthi ehle esihlalweni.

Abanye abake batshengisela ezitaladini zeJohannesburg ensukwini ezisanda kwedlula.
Abanye abake batshengisela ezitaladini zeJohannesburg ensukwini ezisanda kwedlula.

Ngemva kokuxotshwa kukamnumnzana Gordhan isithunzi selizwe sehlisiwe safakwa emazweni ayingozi kwezamabhizimusi, kwabuya kwehliswa isithunzi samabhanga ayisikhombisa.

Ingcitshi kwezomnotho zithi lokhu kuzabhidliza imisebenzi, kubangele ukuhlupheka okukhulu kweleSouth Africa.

Leyinto esilethe ukumanyana kwamaqula atshiyeneyo elizweni jikelele ekutshengiseleni kwakusasa besithi uZuma akehle esihlalweni. Ukutshengisela lokhu kuqoqwe emadolobheni wonke elizweni jikelele kumanyenwe kungakhathalekile ukuthi umuntu ngowayiphi inhlanganiso kumbe ibandla eliphikisayo loba elezokholo.

UZULU KAZIBUSI EZIMBABWE

Lokhu kumanyana sekunconywe kakhulu yizizalwane zeZimbabwe kweleSouth Africa zisithi ukutshengisela ngokumanyana okufanayo nxa bekungenzakala eZimbabwe bekuzadala umehluko omkhulu kakhulu.

Isizalwane seZimbabwe, UMnu. Khulumani Njayi uthi yisibonelo esihle kakhulu leso esikhonjiswa zinhlanganiso zakweleSouth Africa.

“Le yindlela engabanhle nxa ingasetshenziswa eZimbabwe ngoba yilo ilizwe elilenkinga eSouthern Africa elibuyisel emuva umnotho weSouthern Africa ngendlela elibuswa ngayo. Yikho lapha amaZimbabweans ayabe efanele enze njengenhlanganiso lezi zaseSouth Africa ezizimele zodwa lalezi eziphikisana lohulumende ukuthi basuke bebanengi bebambene, basuke bangene ezitaladeni labo bebonise ukungasuthiseki kwabo.”

UMnu. Mlungisi Tshabalala uthi usizi yikuthi eZimbabwe kayikho intandokazulu evumela ukutshengisela okunje ngokukhululeka.

“Balozibuse la. Inkululeko yabo iyabapha amalungelo okuthi benze abakufunayo, ngesikhathi abasifunayo, njalo futhi igovernment yeSouth Africa iyakuhlonipha lokho. Manje kwelakithi eZimbabwe ngale angeke wakwenza lokho ngoba uyahle utshaywe, uvalelwe kumbe ubotshwe kuthiwa why, ungubani. Kuyabe sekuthiwa yi-treason.”

Ngakwelinye icele uTshabalala uthi kungelani lokwehlukana kwemibono, lokwamabandla ezombusazwe, kanye lokwethuselwa nguhulumende, ayikho enye indlela ngaphandle kokuthi wonke amaqula aselizweni alwele ikusasa ekhululekileyo.

“IZanu 2018 izanqoba kukhetho. Iziwinela kahle ingazange yabambabamba indlela okuvotwa ngayo ngenxa yokwehluleka kwethu ama opposition parties ukuhlanganisa amakhanda senze into eyodwa. Khangela eSouth Africa behlukene kodwa ma sekufika entweni eyodwa eqondane labo njengesizwe, behlanganise amakhanda bekhulume ngazwi linye.”

LOKHU KUYADINGEKA EZIMBABWE

Ilunga lebandla le MDC-T, uMnu. Trust Ndlovu, uthi ukutshengisela okufana lalokhu okuqhubeka eSouth Africa kuyadingeka kakhulu eZimbabwe njengoba labo bafuna umongameli okhona manje lebandla lAkhe bephume embusweni ngenxa yokuthi sebeyehlulekile ukubusa.

“Kumele isimo siguquke indlela okubuswa ngayo. Ukuze lokhu kutshitshwe kumele uhulumende okhona akhitshwe. As long sisaseloMugabe, lesystem yakhe, nacho konke okukhona akungeke kuze kuphele lokho.”

Abaqoqa ukutshengisela kwakusasa bathi kuzakuba yikutshengisela okwedlula konke osekuke kwabakhona, kanti bakhuthaza ukuthi kungayiwa emsebenzini abantu bonke bamanyane kubizo lokuthi umongameli Zuma akehle esihlalweni.

Facebook Forum

XS
SM
MD
LG