amalinks wokungena

Breaking News

Izizalwane zeZimbabwe Ezihlala eSouth Africa Zesaba Ukuhlaselwa eGoli


Kukekwahlaselwa izizalwane zeZimbabwe lezivela kwamanye amazwe emnyakeni esanda kwedlula.

Inengi labakwamanye amazwe kwele South Africa sebesesabela ukuthi bangaqala ukuhlaselwa edolobheni leJohannesburg kulandela uhlelo lukaMeya weJohannesburg, UMnu. Herman Mashaba lokududula abantu ezitezi ezingelabanikazi kulelidolobho.

UMashaba umemezele ukuthi lezi zitezi zithunjwe ngabantu bokuza ngakho ufuna ukuzithatha aziphe izizalwane zakwele South Africa.

Uhlelo lwakhe lokuzingela izitezi ezingelabanikazi esithi zithunjwe ngabantu bokuza selulethe ukwesaba okukhulu kuzizalwane zakwamanye amazwe.

Ngemva kokutsha kwesitezi ebesihlala abantu ngokungekho emthethweni eJohannesburg kumaviki edluleyo, uMashaba wethese abakwamanye amazwe umlandu wokuthumba izitezi edolobheni leJohannesburg wafunga egomela esithi ufuna baphume baphele kuleli dolobho.

“Idolobho leJohannesburg ngelabantu bakwele South Africa. Lesiyisiqalo sokukhulu esizakwenza ukukhipha ngodli abantu laba abakulezi zitezi. Izitezi ezedlula amatshumi ayisitshiyagalombili zithethwe yilaba bantu begcina abantu bethu esimeni esibi, bengabhadali beguqula idolobho lethu belenza imikhukhu bona abantu bethu bengelandawo zokuhlala.”

Kusukela leso sikhathi sekududulwe abantu ezitezi ezimbili kwabotshwa abakwamanye amazwe abanengi okuthiwa abalancwadi zokuba selizweni ngokusemthethweni.

Lelinyathelo selithakazelelwe kakhulu linengi labakweleSouth Africa abathi ngeke bathathelwe idolobho labo ngabakwamanye amazwe.

Umgcinisihlalo wenhlanganiso ye Zimbabwe Community in South Africa, uMnu. Ngqabutho Mabhena, uthi amazwi kaMashaba lezenzo zakhe kuyingozi.

“Zinkulumo ezisikhathaza kakhulu ngoba kuyatshengisela ukuthi udlame lungabuya luqubuke izizalwane zaseSouth Africa zisukuma zitshaya abantu bokuza. Thinake njengabantu beZimbabwe Community in South Africa siyazigxeka inkulumo lezi ezenziwa ngumeya.”

Le yinto egcizelelwa ngomunye weZimbabwe umnumnzana Mpiyezwe Nare oyisiphathamandla sebandla le Progressive Democrats of Zimbabwe (PDZ).

“For him umuntu ose ofisini enjengekaMeya abuye phandle emphakathini akhulume into enjengaleyana. It’s reckless. Ule influence enkulu emphakathini. It’s just a disaster waiting to happen.”

Umgcinisihlalo wenhlanganiso elwela amalungelo abomama beZimbabwe kweleSouth Africa unkosazana Victress Mathuthu uthi akungemangalise nxa ixenophobia ingaqhamuka loba nini.

“Iziphakamiso zikasodolobho wedolobho laseJohannesburg umnumnzana uHerman Mashaba ezokuthi abokufika kuleli kufanele bancitshwe indawo zokuhlala babuyiselwe emazweni abo zingaba lomthelela omubi kakhulu ngoba sezingenza izizalwane zakuleli ziqale udlame olubhekiswe kwabokufika osokungenza sibone okwakekwenzeka ngo 2008 ngexonophobia ikakhulu nxa inkulumo ezinjalo ziphuma emuntwini ohlonipheka njengosodolobho.”

Abanye bathi bethuswa yikuthi inkulumo kaMashaba ilandela eyomsekeli kamphathintambo wogatsha lwezamapholisa osanda kukhuthaza izizalwane zakweleSouth Africa ukuthi zithathe amanyethelo ngabakwamanye amazwe asebethumbe idolobho leJohannesburg.

Ngesikhathike ukutshengisela kwezizalwane zakweleSouth Africa ezifuna izindlu lemisebenzi sekusenzakala phose viki zonke, inengike labeZimbabwe bathi besabela ukuthi loba nini kungahlaselwa bona njengembangela yokubangela lezi inhlupho.

Facebook Forum

XS
SM
MD
LG