Izulu lesikhukhula selibulele abantu abedlula amatshumi amahlanu Kwazulu Natal kwele South Africa, kwadilika izindlu lezakhiwo, kwakhukhulwa imigwaqo lezimota.
Izulu lesiqhotho leli eline kuqala ikhefu lePhasika litshiye izindlu zingamawoba, imigwaqo yaphenduka imifula, amaguma kwaba ngamadamu akhukhula izindlu lezimota.
Izinkulungwane endaweni zalesi sabelo kugoqela eManzimtoti zisele zingasela mizi, ukudla, izigqoko lengubo. Inengi lalabo bantu sebegcinwe endaweni zomphakathi lapho asebethola khona usizo olugoqela lolokwelatshwa.
Isakhamuzi seManzimtoti uNkosazana Michelle Van Niekerk uthi amanzi esikhukhula abuye belibele.
“Sithe silokhu sisakhangele esangweni ebelilokhu limi sabona kungaselalutho ngaphakathi. Ngibone izindlu zabomakhelwana lemota kuthathwa ngamanzi. Lomgwaqo ongena egumeni lami lawo uthethwe.”
UMongameli Cyril Ramaphosa, otshiye umhlangano wenhlanganiso yeAfrican Union kwele Egypt usesephakathi egijimela ukuzazibonela ngawakhe, wethekelele indawo ezehlelwe ngumonakalo. Yenake wethule amazwi akhe enduduzo kulabo abafelwe yizihlobo zabo wathembisa ukuthi uhulumende usesebenza gadalala ukusiza imuli ezisele zingelamakhaya.
“Lezi yizimo eziphuthumayo esihlala sizilungiselele ngezemali. Sizabuthelela lonke usizo oludingwa ngabehlelwe yinhlekelele laba ukuze sibasize.”
Ithempeli lePentecostal Holliness eduze leMpangeni yilo eliqale ukuhlaselwa lizulu lesiqhotho leli elibangele ukubhidlika kwemiduli yalo kwahle kwafa abantu abalitshumi lantathu. Abanye ngabafe bewelwa yizindlu kanti abanye bathethwe yizikhukhula zamanzi.
Kubikwa besasebanengi abalokhu benyamalele osekusesatshelwa ukuthi mhlawumbe labo bafile.
IZimbabwe, Mozambique leMalawi asanda kuhlaselwa lizulu lesikhukhula elidale umonakalao owesabakayo kakhulu kwafa amakhulu lmakhulu abantu.
Ingcwethi kwezomkhathi eUniversity ye Witwatersrand umnumnzana Bob Scholtz uthi ukuguquka komkhathi yiyo imbangela yengozi lezi.
“Sesibone inhlekelele ezinengi ezibangelwa yikuguquka kwezomkhathi kugoqela izulu lezikhula, ukutsha kwamahlathi kanye lendlala ebangelwa yikoma”.
Kusenjalo ingcwethi zezomkhathi zithi kungenzeka eleMozambiaque libuye lihlaselwe njalo ngelinye izulu lesikhukhula ele Tropical Cyclone Kenneth.