amalinks wokungena

Breaking News

Izulu Lesiqhotho Libulala Abantu Abathathu eMberengwa

  • Ntungamili Nkomo

Uzulu weMberegwa West ulokhu ematasatasa engazi ukuthi abambe ngaphi kulandela izulu lesiqhotho elibulale abantu abathathu njalo ladiliza imizi engamakhulu amabili ngeviki edluleyo.

Libuye ngolaka lukazamcolo lelizulu lakhukhula imizi, indawana yonke yaphenduka yaba ngamaxhaphozi.

Okuncane obekusemasimini, ikakhulu esigabeni seBhangwe kanye leChizungu, lakho kutshabalele ndawonye lezifuyo ezinengi lenyamazana zendle.

Ngokuzwa ngomonakalo lo, inhlanganiso yeRed Cross isukume ngokuphazima kweso yayaphathisa abantu laba ngokubakhela amatende okuhlala, ibapha ukudla lemvunulo.

Ummeli weMberengwa West edale lephalamende uMnu Joram Gumbou utshele lumsakazo ukuthi umonakalo ube mkhulu kakhulu kulindawo. Kodwa uthi bayajabula ngoncedo abalutholayo.

"Ngikhuluma lawe nje abakahulumende kanye labeRed Cross bayazama ukusincedisa ngokudla, indawo zokuhlala lokunye okutshiyeneyo," kutsho uGumbo.

Izulu leli line ngesikhathi izigaba zelizwe ezinengi zome qha ngoba selilesikhathi eside lingani.

Abantu abanengi bathi abasoze bavune lutho lonyaka, kanti abanye ngabakhala ngokuthi bazafelwa yizifuyo ngoba umumo womkhathi uthembisa indlala emangalisayo.
XS
SM
MD
LG