amalinks wokungena

Breaking News

John Mangudya: Akwehliswe Umthelo Wamafutha Ezimota


Owesifazana udlula lapho okuthengiswa khona amafutha ezimota ... (REUTERS/Philimon Bulawayo)
Owesifazana udlula lapho okuthengiswa khona amafutha ezimota ... (REUTERS/Philimon Bulawayo)

Usibalukhulu webhanga lesizwe ele Reserve Bank of Zimbabwe, uDr John Mangudya, uthi umthelo wamafutha ezimota kahulumende uqonge kakhulu ngakho kufanele wehliswe ukuze uzulu enelise intengo yawo.

Ekhuluma kuKhomithi yePhalamende ebona ngamandla kagetsi lamafutha eye Energy and Power Development ngoLwesine eHarare, uMangudya uthe ukhuphuke kakhulu umthelo ofakwa kuntengo yamafutha epetulo.

Intengo yamafutha ezimota yakhuphuka ngokulikhulu lamatshumi amahlanu kusilinganiso sekhulu - 150 percent, ngoZibandlela okwabangela ukutshengisela kukazulu emigwaqweni okwaqoqwa yinhlanganiso emela izisebenzi eye Zimbabwe Congress of Trade Unions.

UMangudya uthi ukuqonga lokhu kwentengo yamafutha ezimota kwabangela ukwehla kwenani lamafutha asetshenziswa elizweni ngoba inengi lingasenelisi ukuwathenga.

“Thina esikholwa kukho yikuthi uhulumende ayehlise ihlephu lomthelo wamafutha angena kuleli. Lokhu kuzasiza ukuthi intengo yalawo mafutha layo yehle okuzkwenza uzulu laye anelise ukuthenga.”

Uhulumende uthola amadola amabili lamacent amahlanu, $ 2.05, ku madola amathathu lamacent angamatshumi amathathu lane, $ 3.34 kulita elilodwa.

Lokhu kutsho ukuthi isilinganiso esikhulu sentengo yamafutha siya kuhulumende.

UMangudya ubuye wathi indwendwe zezimota zidinga amafutha okuhambisa zizaphela kuyonale inyanga ngoba ibhanga elikhulu liphatheke ngendlela zokubona ukuthi amafutha abuya elizweni masinya.

Uthe isizatho ebesisenza amafutha aswelakale ngesokuthi indlela zokubhadala lawo mafutha kanye lokuwaletha elizweni beziphuziswa ngamabhanga aphandle akade ethatha isikhathi eside ukuze avume izincwadi zokuthenga amafutha ngesikwelede ezaziwa ngokuthi ngama Letters of Credit ngeSingisi.

“Inengi lamafutha esiwathengayo elizweni siwathenga ngezincwadi zezikwelede ezibizwa ngokuthi yiLetter of Credit. ILetter of Credit yincwadi esetshenziswa ngamabhanga ukuthi athenge impahla ezitshiyeneyo ngesikwelede. Kunjalo kulokuphuza kusukela kulanga lapho incwadi le efika emabhanga lelanga lapho amafutha azalethwa khona elizweni ngoba uhlelo lwakhona lude.”

Kodwa inengi labantu abakhulume leStudio 7 bathe sokuyisikhathi uMangudya elokhu ethembisa ukuthi amafutha ezimota azatholakala.

UMnu. Thembelihle Sihwa, isakhamuzi seHarare, uthe loba amafutha eqhubeka eswelakala kubalulekile ukuthi uhulumende ehlise intengo yawo ngoba uzulu akasenelisi ukuwathenga. USihwa uthe akasenelisi ukuthi atshayele imota yakhe esiya emsebenzini ngoba intengo yamafutha eyisamvumeli ukuthi atshayele nsuku zonke.

NgoMvulo uhulumende wazise amankampani aledola leMelika ayenelisa ukuzithengela amafutha epetulo ukuthi bawathenge kwamanye amazwe nxa befisa ukuzisebenzisela.

XS
SM
MD
LG