Abalwa impi yenkululeko, bathi makabotshwe umka mongameli uNkosikazi Grace Mugabe, axotshwe lasebandleni kulandela inkulumo yakhe, yokukhuthaza umongameli ukuba abethe igama lalowo okumele athathe isikundla sakhe, okuludaba osolwabophisa iziphathamandla ze Zanu Pf ezinengi.
Emhlanganweni lentathelizindaba, e Harare Club, unobhala jikelele, wabalwa impi yenkululeko, umnumzana Victor Matemadanda, uthi inkulumo kankosikazi Mugabe, kuliphupho akutshoyo, kungekhe kwenzakale besawadla amabele.
U Matemadanda uthi, abasoke bavumele ubukhokheli bakuleli, bube ngobomndeni, ngoba kungayisikho okwayelwa empini, ngoba inkokheli kumele zikhethwe ngabantu, hatshi okutshiwo ngunkosikazi Mugabe labamsekelayo.
Okungumbono osekelwe ngomunye wabalwa impi yenkululeko, umnumzana Tawanda Chipato, okhuthaza uzulu ukuba akangathuli nje, esekela inkokheli isenza santando.
Abalwa impi yenkululeko, bathi sesifikile isikhathi sokuba uzulu weZimbabwe amanyane, asebebenze ndawonye, ukulwisana lemizamo yenkokheli yeZanu Pf, esifuna ukwenza okuphambana lokufunwa ngabanengi.
Bathi makungakhangelwa ezamabandla ombusazwe, kodwa injongo yokwakha ilizwe, atsho akufunayo.
Bayemba phansi ukuba lokho okutshiwo ngumka mongameli Robert Mugabe, kungasoze kwenzakala ngoba kuphambana lesisekelo sombuso kanye lezivumelwano ezenziwa ngesikhathi kulwiwa impi, ezazisitsho ukuba ubukhokheli budedelanwa kanjani.
