Ingcwethi kwezomnotho welizwe zithi ukuguqulwa kwedale labaphathintambo, iCabinet, okwenziwe nguMongameli Robert Mugabe akusoze kuphathise ukuvuselela umnotho welizwe oqhubeka usiya ngangxele.
UMnu. Patrick Chinamasa, obengumphathintambo wezemali, ususiwe kuleso sikhundla kwafakwa uMnu. Ignatius Chombo.
Abanye abaphathintambo abalengatsha eziphathelane lezomnotho welizwe babalisa uMnu. Edgar Mbwembwe, ophiwe isikhundla sezokwethekelelwa kwelizwe, lo uNkosikazi Chiratidzo Mabuwa, osebona ngezokuthuthukisa amabhizimusi abansundu.
Usomabhizimusi, uMnu. Anglistone Sibanda, uthi amalunga edale leli kawasoze aphathise ngalutho ngoba abanye bakhona bengazake benze umsebenzi ofanayo.
Obengumphathintambo wenhlalakahle yabalwa impi yenkululeko, uMnu. Tshinga Dube, uthi ukubunjwa kwedale leli kubangelwe yikungahambi kahle kwezomnotho welizwe.
Omunye njalo usomabhizimusi, uMnu. Albert Mhlanga, uthi udubo olubekhona ekukhetheni abaphathintambo yikuthi kusetshenziswe ezombusazwe kungakhathalekile lokuthi bayenelisa na ukuvuselela umnotho welizwe.
Ingcwethi ecubungula ezomnotho, uMnu. Rejoice Ngwenya, uthi inengi labakhethiweyo kalazi umsebenzi okuzakwenza umnotho welizwe uqhubeke ulokhe usiya ngangxele.
UMnu. Chinamasa ungapha kwele Melika lapho angena khona imihlangano ye IMF okuyikho azwe ukuthi kasenguye umphathintambo wezemali.
