Iziphathamandla ezimbili zebandla leZANU PF eBuhera District zibikwa zimiswe phambi komthethwandaba kamantshi, sizetheswa icala lokuloya kumbango wezikhundla ebandleni leli.
Ababili laba uMnumzana Zvenyika Machokoto lomkakhe uJudith Muodzeri bahlawuliswe amatshumi amahlanu amadollar eMelika-US$50 yesibambiso, umuntu ngamunye ngumantshi uMnumzana Fabian Feshete.
Ababili laba babotshwe ngeviki edluleyo ngoba beyecela uncedo komunye umporofitha lokuthi babulale iziphathamandla zeZANU PF ezigoqela uMnumzana Kumbirai Kangai, Joseph Chinotimba labanye.
Loludaba lulandela ezinye ezimbalwa eziphume ezindabeni, zalabo abaphakatheke kwezombusazwe abakhanya sebele nani eliqongileyo lasebedinga kakhulu uncedo ezinyangeni, osiyazi, labenkolo ezitshiyeneyo befuna ukukhokhelelwa lokuba lenhlanhla ngaphambilini kokhetho olungakaziwa ukuthi luzakwenziwa nini.
Inhloko kahulumende uMnumzana Morgan Tsvangirai lesinye isiphathamandla sebandla lakhe uNkosikazi Theresa Makone ongomunye wabaphathintambo bendaba zaphakathi kwelizwe babikwa labo bethekelele umfundisi wakwele Nigeria u TB Joshua ukuyadinga ukugeziswa iminyama.
UTsvangirai ubikwa ethekelele uTB Joshua edinga ukuhlanjululwa ngaphambilini kokhetho. UNkosikazi Makone ubikwa ubedinga inhlanhla ngaphambilini kweCongress yebandla lika Tsvangirai ezakwenziwa ngenyanga kaNkwenkwezi.
UTB Joshua okhokhela inkonzo ethiwa The Synagogue Church of all Nations udume ngokukhulekela lokwelapha abagulayo labadinga ukuphumelela empilweni.
UBrenda Moyo weStudio 7 ukhulume lenyanga yakoBulawayo uMnumzana David Mhabhinyane Ngwenya ongumsekeli kamgcinisihlalo wenhlanganiso yeTraditional Healers Council, othi kuhle ukuthi umuntu adinge inhlanhla kubelaphi, esola kakhulu labo abadinga imithi yokubulala.