amalinks wokungena

Breaking News

'Kasimvoteli uMnangagwa Olobudlelwano Labagongoda Abantu Kumbhuqazwe weGukurahundi'


UMongameli Emmerson Mnangagwa ukhengelelwe ukuthi uzancintisana loMnu. Morgan Tsvangirai kukhetho lokudinga umongameli oluzakwenziwa ngomnyaka ozayo.
UMongameli Emmerson Mnangagwa ukhengelelwe ukuthi uzancintisana loMnu. Morgan Tsvangirai kukhetho lokudinga umongameli oluzakwenziwa ngomnyaka ozayo.

Kulabantu abathi kabasoze bavotele uMongameli Emmerson Mnangagwa kukhetho lokudinga umongameli oluzakwenziwa ngomnyaka ozayo ngoba ucatshangelwe ukuthi wayeyingxenye yalabo abagongoda uzulu ngesikhathi sombhuqazwe weGukurahundi ilizwe leZimbabwe lisanda kuthola uzibuse.

Omunye wabakhulume leStudio 7 nguMnu. Mqondisi Moyo webandla le Mthwakazi Republic Party, othe kunzima kakhulu ukuthi abantu abanengi bavotele uMnangagwa ngoba ucatshangelwe ukuthi wayebambisana lowayengumongameli, uMnu. Robert Mugabe, ngesikhathi sombhuqazwe weGukurahundi.

UMoyo uthe abantu bayakwazi ukuthi lakhathesi uMnangagwa ungene esikhundleni sikamongameli ngenxa yebutho.

Ibutho leZimbabwe, libambisane lecele lebandla leZanu PF elaziwa ngokuthi yi-Team Lacoste elalicatshangelwe ukuthi lalikhokhelwa nguMnangagwa, lahluthuna intambo zombuso ezaziphethwe nguMugabe.

UMnu. Iphithule Maphosa, isikhulumeli sebandla leZapu ekhokhelwa nguMnu. Dumiso Dabengwa, uthe uMnangagwa uyesatshwa ngabantu abacabanga ukuthi ngumuntu odlelana lebutho.

Uthe ngalesosizatho njalo langodaba lwe Gukurahundi, akaboni ukuthi uzavotelwa ngabantu ezabelweni zeMatabeleland leNkabazwe lapho okwabulawa khona abantu abafika inkulungwane ezingamatshumi amabili – 20,000 – livuyo le Fifth Brigade.

Osakhulayo, uThando Gwinji, uthe abantu lokhe beyethukile ngendlela uMnangagwa angena ngayo esikhundleni sikamongameli.

Ngakho-ke, uthe ngeke bamvotela ngoba kuthiwa wancedisa iGukurahundi ukuthi ibulale izihlobo labangane ababesekela ibandla le Zapu elalikhokhelwa ngumuyi u-Joshua Mqabuko Nkomo, kusukela ilizwe lithola uzibuse kwaze kwayafika isikhathi selizamanyana lele Zanu PF ngomnyaka ka1987.

Olwela ilungelo loluntu, uMnu. Mbuso Fuzwayo, uthe kaboni abantu bevotela uMnangagwa ngoba lokhe becabanga ukuthi uqhubekela phambili ngenhlelo zikaMugabe.

UNkosikazi Abigale Mupambi, umqondisi wenhlanganiso ehlolisisa isisekelo sombuso welizwe eye This Constitution Alliance, uthe abantu balakho ukuvotela ibandla leZanu PF, ikakhulu bangethuselwa libutho elilokhe lisemigwaqweni loba uMugabe sowasuka esikhundleni.

Uthe abantu besaba kakhulu okwenziwa libutho leGukurahundi.

UMnu. Effort Nkomo okubandla leZanu PF uthe abantu abalelungelo lokukhuluma abakufunayo ngoMnangagwa.

UNkomo uthe kusobala ukuthi uMnangagwa uzakhethwa ukuba ngumongameli weZimbabwe kukhetho oluzayo.

Inkhokheli yamabandla ephikisa elibusayo, egoqela uMnu. Morgan Tsvangirai webandla leMDC-T, ikhangelelwe ukuthi izancintisa kukhetho oluzakwenziwa ngomnyaka ozayo.

XS
SM
MD
LG