Kuhlohlwe imiklomelo elitshumi kuphela ngeviki yakuqala eyemidlalo eye Castle Premier Soccer League yalonyaka.
Lelinani lingaphansi kakhulu nxa kuqathaniswa lelanyakenye lapho okwahlohlwa khona amagoli angamatshumi amabili lambili (22) ngeviki lakuqala yemidlalo ye PSL.
Ngeviki lakuqala nyakenye akulamidlalo ephele kungahlohlwananga kodwa lonyaka imidlalo emine iphele zingutshiki lobhanqa kungela qembu elenelise ukulitshayela emambuleni.
Nyakenye kuleqembu elilodwa elinqobe ngemva kokuhlohla kanye kusithi amanye ayehlohla kabili loba kathathu njalo akulaqembu elahlohla okwedlula kathathu.
Lonyaka ke kube lamaqembu amathathu anqobe nge 1 ka nya njalo lawo ngabalisa ele ZPC Kariba elitshaye ele How Mine ngoMgqibelo, ele Ngezi Platinum elitshaye ele Black Rhinos ngoMgqibelo njalo, kanye lele FC Platinum elinqobe ele Dynamos ngeSonto.
Abe mabili kuphela amaqembu anqobe ngemiklomelo emibili kusiya phezulu njalo lawa ngabalisa ele Highlanders lona elitshaye ele Bulawayo City nge 2-0 ngeSonto kanye lele Chicken Inn elibhaxabule ele Bantu Rovers nge 5 ka nya ngoMgqibelo.
Ekhuluma ngemva komdlalo wabo leqembu le Highlanders umqeqetshi weqembu le Bulawayo City uMandla Mpofu uthe akulahlwa mbeleko ngokufelwa njalo bakhangelele ukudlala ukwenza ngcono kumidlalo elandelayo.
“Ngibona sidlale kuhle loba zingasatholanga imiklomelo ebesiyifuna njalo kusiyaphambili sizalungisisa. Abafana badlale kuhle kubeliphutha nje ukuba kasisatholanga imiklomelo kodwa sizakulungisisa lokhu.”
Iqembu le Chicken Inn yilo elihlezi phezu kwengalane yemiklomelo ngoba lihlohle kahlanu kuthi ngemva kwalo kuleqembu le Highlanders lona elihlohle kabili njalo lihlezi endaweni yesibili engalaneni yemiklomelo.
Endaweni yesithathu kulamaqembu amathathu alingene ngemiklomelo langamagoli njalo lawa ngabalisa ele Ngezi Platinum Stars, ele FC Platinum kanye lele ZPC Kariba.
Kusukela kundawo yesithupha kusiya kundawo ye tshumi lantathu kuhlezi amaqembu alomklomelo owodwa ngemva kokuba ngutshiki lobhanqa emidlalweni abephatheke kiyo njalo lawamaqembu ngabalisa ele CAPS United, ele Shabanie Mine, ele Chapungu, ele Triangle, ele Harare City, ele Yadah, ele Tsholotsho, kanye lele Hwange.
Amaqembu angakatholi ngitsho lowodwa umklomelo ngabalisa ele Black Rhinos, ele Dynamos kanye lele How Mine wona ahlohlwe kanye kuthi elisendaweni yesibili nxa usuka ngaphansi kwengalane ngele Bulawayo City elihlohlwe kabili kuthi elijeke amanye liqembu ngele Bantu Rovers lona elihlohlwe kahlanu.
