amalinks wokungena

Breaking News

'Kayincedi Lutho Imihlangano Eyenziwa NguMugabe Labatsha'


Abalandeli bebandla leZanu PF.
Abalandeli bebandla leZanu PF.

Inengi labasakhulayo basesigabeni seMatabeleland North lithi alisekeli umkhankaso kaMongameli Robert Mugabe wemihlangano labasakhulayo oweYouth Interface.

Bathi imihlangano le kayibaletheli nzunzo lentuthuko eZimbabwe ngaphandle kokukhankasela uMugabe kukhetho oluzayo luka2018.

Bekhuluma emhlanganweni oqoqwe libandla leZAPU eMzola, izakhamizi zeLupane West zithe sokuyiminyaka edlula amatshumi amathathu zisetshenziswa nguMongameli Mugabe kodwa ngemva kokuvota azitholi lutho oluthuthukisa isigaba.

UMgcinisihlalo weZAPU esabelweni seMatabeleland North, uMnu. Lot Khuphe, uthe uMugabe kehlukane lokufuna ukusebenzisa abasakhulayo besigaba.

UMnu. Nkululeko Nyoni, uvumelana loKhuphe esithi kanti vele ufuna ukubusa kuze kubenini.

Esinye njalo isakhamuzi, uMnu. Joseph Mpofu, uthe uMugabe kayephumula wabasebenzisa kwenela.

Osakhulayo uMehluli Ndebele uthe imihlangano kaMugabe ayenza labatsha ingcolile njengoba inengi labasakhulayo lingelamisebenzi.

UMnu. Norman Dliwayo, esinye njalo isakhamuzi seMzola, uthe leyo mihlangano abayifuni ngoba kayincedi abasakhulayo.

UMongameli Mugabe useqhube imihlangano emihlanu ezigabeni ezimbalwa labasakhulayo usesalelwe ngeminhlanu lapho ajonge ukudinga usekelo kukhetho lomnyaka ozayo kwabasakhulayo phansi kohlelo alubiza ngokuthi yiYouth Interface egcwalisa uhlelo lwebandla elibusayo abalubiza ngokuthi yiGeneration of 40 ngoba abasakhulayo banengi njalo balakho ukuvota ngobunengi banqobe.

Inengi labantu liyayisola limhlangano ikakhulu abadala kunye labalwa impi yenkululeko bethi uMugabe wabasebenzisa isikhathi eside kodwa engagcwalisa izithembiso nanko oseqambukela abasakhulayo abangazi imigqa yakhe.

Umhlangano weYouth Interface olandelayo wenzelwa eNkabazwe.

XS
SM
MD
LG