amalinks wokungena

Breaking News

Kembo Mohadi: Abanikwe Amapulazi Abasakhulayo


UMnu. Kembo Mohadi
UMnu. Kembo Mohadi

Umsekeli kamongameli welizwe leZimbabwe, uMnu. Kembo Mohadi, uthi kumele abatsha badingelwe umhlabathi ukwenzela ukuthi bazithuthukise.

UMohadi, owethule lokhu emhlanganweni awenze labatsha ewofisini yebandla leZanu PF eHarare ngoLwesithathu, uthe kuqakathekile ukuthi abatsha banikwe umhlabathi nguhulumende ngoba yibo insika yelizwe.

“Sicela uhulumende lohlangothi olubona ngezokulima lomhlabathi ukuthi banike abatsha umhlabathi. Ngibikelwe ukuthi abatsha kabalamhlabathi njengabantu abathola umhlabathi. Kumele sibanike umhlabathi ukwenzela ukuthi balime.

“Lokhu kuzakwenza ukuthi bazithuthukise ngemfanelo ngoba yibo abanikazi belizwe leZimbabwe. Kumele bawusebenzise umhlabathi ukuthi bazithuthukise njalo bathuthukise ilizwe lethu.”

UMohadi wethule lokhu ngesikhathi kulungiselelwa umhlangano omkhulu webandla leli oweAnnual People’s Conference ozakwenzelwa eGoromonzi esabelweni seMashonaland East ngoLwesihlanu.

Emhlanganweni munye umgcinisihlalo wohlangothi lwabasakhulayo kulelibandla olwe Zanu PF Youth League, uMnu. Pupurai Togarepi, ukhuthaze abasakhulayo laba ukuthi babisele izikwelede abayabe bezithethe emabhanga ukuze lawo athole imali yokukweledisa abanye kwelizayo.

UTogarepi ucine ngokubonga umusa owenziwa libhanga eleEmpower Bank eliyilo elikweledisa abasakhulayo abangela okokubambisa icollateral, ngakho-ke kuqakathekile ukuthi abakweleda kilo babisele imali abayabe beyibolekile ukuthi lalo liqhubeke lisebenza.

Idale laphezulu elePolitburo leZanu PF belikhangelelwe ukuhlangana ngoLwesihlanu lihlela uluhlu lwendaba ezizahlaziywa kulumhlangano owenziwa kanye ngomnyaka. Lumhlangano ukhangelelwe ukuvulwa okusemthethweni nguMongameli Emmerson Mnangagwa, ngoLwesihlanu.

Okuzavunyelanwa emhlanganweni wangoLwesithathu owePolitburo kuzaphinda kuhluzwe ngelinye njalo idale eleCentral Committee yeZanu PF, andubana kube yizihloko zendaba ezihluzwa emhlanganweni omkhulu eGoromonzi.

Isikhulumeli sebandla leZanu PF, uMnu. Simon Khaya, utshele intathelizindaba ngoLwesibili ukuthi ibandla lakhe lilungiselele okweneleyo umhlangano walonyaka okhangelelwe ukuphuma lamacebo okulungisisa okuhluphayo eZimbabwe okugoqela umumo womnotho omubi welizwe, ezombuso welizwe kanye lokuhluphayo ebandleni lelo. Lumhlangano ukhangelelwe ukungenwa ngamalunga eZanu PF angaba zinkulungwane ezedlula ezinhlanu.

Uhulumende kamuyi uRobert Mugabe wathathela abalimi abamhlophe umhlabathi abedlula inkulungwana ezine kusukela ngomnyaka ka2000. Ababona ngokwenzakalayo bathi lokhu yikho okwabhidliza umnotho welizwe leZimbabwe.

Kodwa-ke uMugabe wathi kwenzelwa ukuthi umhlabathi uthathwe ngabansundu abancindezelwa ngabamhlophe baze badinga izikhali emazweni atshiyeneyo basusa uhulumende kamuyi uIan Douglas Smith embusweni ngomnyaka ka1980.

please wait

No media source currently available

0:00 0:03:42 0:00


XS
SM
MD
LG