amalinks wokungena

Breaking News

Lizalahlwa Yini Icala Eletheswa Izakhamizi Ezathathelwa Amasimu?


Izizalwane zeKezi ziya emthethwandaba lapho ezetheswa khona icala lokutshengisela eMaphisa Police Station.

Idale likaMantshi eKezi esabelweni seMatabeleland South ngoLwesibili licelwe ukuba lilahlele khatshana icala lezakhamizi ezadilizelwa imizi zathathelwa lamasimu ezibotshwe zitshengisela eNkambeni yamapholisa eMaphisa ngomnyaka ophelileyo.

Igqwetha elimele izakhamizi lezi lithe kabukho ubufakazi obuveza sobala ukuba batshengisela enkambeni leyo okungekho emthethweni.

UMantshi weKezi, uMnu. Jimmy Ntonga, ubeke uMvulo ozayo njengelanga lokuthatha isinqumo ngaloludaba ngemva kokuba igqwetha labathonisiswayo laba abangamtshumi amabili lasithupa, uMnu. Prince Bhutshe Dube, ecele ukuba icala lilahlwe ngoba abafakazi besipha ubufakazi obuphikisanayo.

UDube oweMathonsi Ncube Law Chambers uthi ubufakazi obethulwe edale ngabafakazi abane abukhombisi ukuba izibotshwa zatshengisela okungekho emthethweni njalo lengoma ababeyihlabela ayibophisi ngoba lamapholisa abacalayo abayazi ukuthi itshoni.

Uthe lamagwaliba ababelawo awephuli lungelo loluntu ngakho akusizi ukuthi idale liqhubeke ngecala.

Uthe ngalesosizatho akwenzi ukuthi izibotshwa zifakaze ngoba abafakazi ababalisa uDube Levy, uChopper Chaster, uHebert Madyise loEzekiel Nyungu bayaphikisana ngobufakazi ababukhulume edale.

UDube uthi umtshutshisi, uMnu. Tafireyi Smart, uvumile ukuba icala eletheswa izibotshwa ubufakazi abubuvezi njalo akulacala abalenzayo lababantu.

Izakhamizi zeMahetshe, eQinisela le Zwehamba eMaphisa ezigoqela uSenator Sithembile Mlotshwa, uMember Ndlovu, uDugmond Munzeyi, uBishop Dube, uDouglas Ngwenya, uAlvet Nsingo, uGift Nsingo, uNathaniel Maduna, uNosizo Ndlovu, uJuliana Ncube, labanye babikwa betshengisele mhlaka 23 Mpandula bethwele amagwaliba abhalwe ukuthi:
‘Abantwana beBhalagwe bahlupheka’, ‘Police police stop killing us we want our land’, ‘Chinyayi must go sifuna umhlabathi wethu’, lokunye okunengi nengi.

Izakhamizi lezi zibikwa zihlangene emzini kaSenator Mlotshwa zaloba amagwaliba okutshengisela.

Besukalapho, uMlotshwa wathwala abatshengiselayo ngemota yakhe baya eMaphisa Police Station bafika khona batshengisela behlabela.

Amapholisa ethesa izakhamizi icala lokutshengisela bethi kuletha ukuxokozela kanye lokudala inzondo kuARDA leTREK kanye lamapholisa ngoba behlukanisa imihlobo phakathi kwabeSiShona lamaNdebele ngakho laba bantu bengelayo imvumo yokutshengisela ngendlela abaziphatha ngayo.

Abantu baze ngobunengi bezosekela ababotshiweyo. Idale lenelise ukulalela ubufakazi lapho ababuzwe khona ukuba ukuhlabelela ingoma lamagwaliba kakuzange kukhombise ubudlwangudlwangu njalo banqabela abantu ukuya tshengisela inkundla ibabuze njalo labo bavuma kodwa bathi inkokheli zabo azibazisanga ngokutshengisela ona kulomuntu owabancweba udlebe.

Abafakazi batshiye inkundla ifile ngokuhleka lapho bethi abazi ukuthi kulamapholisa ebutho lokuthi ukuhlabelela ngeSiNdebele kulobudlwangudlwangu kanye lokuthi kuleTRK-ARDA yeSiNdebeleni.

Udaba Esilethulwe NguNompumelelo Moyo
please wait

No media source currently available

0:00 0:05:20 0:00
Lapho esitholakala khona

Facebook Forum

XS
SM
MD
LG