amalinks wokungena

Breaking News

Iqembu leZimbabwe Linqoba ele Ireland Emdlalweni Wekhilikithi


FILE: Iqembu leZimbabwe linqobe ele Ireland emdlalweni wekhilikithi.

Iqembu le Zimbabwe linqobe ele Ireland ngama runs alikhulu lesikhombisa (107) ngemva kokuba lona liqale ukutshaya ibhola labuthelela ama runs angamakhulu amabili letshumi lanye (211) ngemva kokulahlekelwa ngabadlali abayithoba munwe munye kuma overs alo angamatshumi amahlanu.

Ele Ireland seliphendula lenelise ama runs alikhulu lane (104) lilahlekelwe ngabadlali bonke kuma overs edlula amatshumi amathathu lane (34.2).

Limpumela itsho ukuba iqembu le Zimbabwe yilo elihlezi phezu kwengalane yamaqembu afinyelele kusigaba seSuper Six lilemiklomelo emihlanu okulinani eliphethwe liqembu le Australia njalo zombili iZimbabwe le Australia yizo ezingakanqotshwa selokhu kusungulwe limidlalo eqhutshelwa elizweni le Zimbabwe.

Intathelizindaba yezemidlalo, uNash Mkokwayarira, uthi iqembu le Zimbabwe kumele libophe ziqine kusiya phambili ngoba kukhona lapho elingaqhubi khona kuhle.

“Ngokubona kwami abafana beZimbabwe batshengise ukuba noma bengadlalanga kuhle nge bat balakho ukwenza kuhle nxa sekuyibo abaphosayo.

“Kuhle ukuthi banqobile njalo lokhe beqhubekela phambili benqoba kodwa kusekhona ukuthi kulungisiswe ikakhulu nxa kuyithi okumele sitshaye ibhola kumele sitshaye sithole ama runs amanengi ikakhulu labo abaqalisayo.”

Uphinde wathi, “Ungananzelela sesilokhu sikhangelela uBrendan Taylor kanye lo Sikandar Raza ukuthi batshaye ama runs amanengi ikanti laba abaqalisayo ukutshaya kumele bayenze izinto zibelula ukuze sithole ama runs amanengi.”

Emdlalweni walo olandelayo iqembu le Zimbabwe lizadibana lele West Indies ngoMvulo mhla zilitshumi lathoba munwe munye kuthi ngemva kwalokho lizadibana lele United Arab Emirates ngoLwesine mhla zingamatshumi amabili kuyonale inyanga.

Amaqembu amabili azaphutsha imidlalo yesigaba se Super Six ehelzi endaweni ezimbili eziphezu kwengalane azathola ilungelo elokuyaphatheka kumncintiswano wezizwe zomhlaba ozaqhutshelwa kwele Ngilandi ngomnyaka ozayo.

Facebook Forum

XS
SM
MD
LG