amalinks wokungena

Akula Ezifela Emlonyeni Lonyaka NgeKhisimusi

  • Bennedict Nhlapho

Akula ezifela emlonyeni lonyaka ngesikhathi seKhisimusi.

Lobanje ikhefu lekhisimusi lidume ngentokozo lokudliwa kwamakhumukhumu lezifelemlonyeni, izizalwane ezinengi zeZimbabwe ezihlala kwele South Africa zithi bekunzima ukuphandela imuli ngomnyaka ka2016.

Banengi abaqede umnyaka bengasebenzi ngenxa yokoma kwezomnotho kuthi-ke abanye sibakhalele isigumula phakathi komnyaka.

UMnu. Titus Ndlovu, ofike eGoli ngomnyaka ka1986, uthi umnyaka lo uqale waze wayaphela ibhizimusi lakhe lezokudla kumi ndawonye.

“Mmmm u2016 kimi akahambanga kahle ngoba lokuyi business kwami lokhu engikwenzayo ngibona engathi kwehle kakhulu. Ngoba uyabona lefridge lami li empty akulalutho. Ngoba uyabona ngihleli khonala, bangaki ama customer akhona nampa abayi three, akulalutho kantike phambilini ubuthola kugcwele kunyakazela.”

UMnu. Ndlovu uthi ukoma kwezomnotho kweleSouth Africa yikho okube luhlupho olukhulu ngo 2016.

“Abantu abalamali nxa ngikhangele kahle ngoba umkhonomi wonke nje ukhangele izwelonke nje uyabona ukuthi mmmhh umkhonomi uphansi, lemsebenzi ayikho kahle ngingazi ukuthi may be umnyaka lo ozayo u2017 may be uzabangcono ngoba ma ngithi ngiyabheka hayi akuhambi kahle.”

Esinye isizalwane seZimbabwe, uMnu. Thembani Ncube, uthi okubazwisa ubuhlungu yikuthi bekuwomile njalo kwele Zimbabwe izihlobo zisehluleka ukuphandela imuli.

“U-2016 ngumnyaka obunzima kakhulu. Unzima ekuthini for abantu abaseZimbabwe, ngumnyaka obungathi kade kungaqondakali ukuthi uhamba njani.”

“Bakhona abahlala lapha bengelamaphepha. Kunzima ngoba ba forced ukuba le hand to mouth. There is no investment at home because baphelela kubo R3500, so it’s hard for them. May be it’s good for those who are legal, abalamaphepha abo, but for the majority which are youths it’s not looking good because they can’t even plan ahead.”

Loba kunjalo, bakhona abalutshwana abatshaya umpululo ngoba besithi izinto zibahambele kuhle okumangalisayo.

UMnu. Bashimane Ndlovu, umlingisi weZimbabwe odume ngelithi Madlela, uthi kuye u2016 ube ngunyoni ntshantshaza.

“Umnyaka lowu ubumuhle kakhulu. Sisebenze kahle kakhulu. Ngingatsho ngithi lumnyaka ngicabanga ukuthi yiwo othethe ibrand Madlela wayiphakamisela phezulu ngoba senze amaprojects amanengi kakhulu labantu ngendlela abathakazelele ngakhona into esizenzayo ngibona engathi kukhuphukile, kuphakamise izinga kakhulu. Ngingatsho ngithi hayi sisebenzile kakhulu lonyaka.”

Lokhu akutshoyo kufakazwa langumvuzo wokwenza kahle awutholileyo.

“Nganominetwa kuma Zim achievers, kucategory ye People’s Choice. Abantu bavota kakhulu ngaseke ngiyayithatha leyo ndondo kuleyo category. Amaplans yikuthi siqhubeke sikhulisa lo uMadlela. Besikweyinye I level, manje sekufanele siyithathe siyise kwenye I level ngoba umnyaka lomnyaka kumele uze nento zawo ezinye.”

Labo-ke izinto ezingahambanga kahle bathi kabasoze balahle imbeleko ngokufelwa ngethemba lokuthi ngomnyaka ozayo bazakuthola abakudingayo.

XS
SM
MD
LG