UMongameli Jacob Zuma weleSouth Africa, yena ongumlamulankunzi njalo kudaba lweZimbabwe sekhuthaze inkokheli yamabandla akuhulumende womanyano ukuthi ikhulumisane ngokuqotho ilungisise konke okuhluphayo elizweni.
Umcebisi kaZuma, uNkosazana Lindiwe Zulu utshele iStudio 7 ukuthi lanxa uMongameli Zuma ezimisele ukuqhubeka edinga isisombululo kudaba lweZimbabwe, abakhokheli beMDC labeZanu PF labo kumele batshengise ukuzimisela bakhulumisane ukuze kuqedwe okuhluphayo kuhulumende womanyano.
EleSouth Africa lithi lilokukhathazeka okukhulu ngokuphuza kwamalunga eSadc Troika agoqela eleMozambique leleZambia ukukhetha amalunga okuyasebenzelana leJomic njengokulaya kweSadc kunyanga edluleyo.
Kodwa umabhalane weSadc uMnu Tomaz Salomao uthi amalunga la kudala akhethwa lanxa nje engakayi eZimbabwe, okuyinto elandulwa ngeleSouth Africa.
Isikhulumeli secele leMDC elikhokhelwa nguMnu Welshman Ncube uMnu Nhlanhla Dube utshele uNtungamili Nkomo weStudio 7 ukuthi uvumelana loZuma ekuthini ngempela udaba lweZimbabwe kumele lulungisiswe yizizalwane zeZimbabwe ngokwazo.
