amalinks wokungena

'Akwakhiwe Indawo Ezinengi Zokuhlola Umkhuhlane Wemvukuzane eZimbabwe'


UNkosazana Thokozani Khupe

UMsekeli kamongameli webandla leMDC-T, uNkosazana Thokozani
Khuphe, usekhuthaze ugatsha lwezempilakahle ukuba lusungule uhlelo
lokuhlola lokwelapha umkhuhlane wemvukuzane ezibhedlela zonke zelizwe.
UNkosazana Khuphe uthe unani labantu abalomkhuhlane lingaphunguleka nxa lokhu kungenziwa.

UKhuphe ngomunye wabantu abahlaselwa ngumkhuhlane wemvukuzane, kodwa wasila kulandela ukuthola ukwelatshwa masinya.

Ngemva kokunanzelela ukuba umkhuhlane wemvukuzane uyabulala uma umuntu eswele ukwelatshwa masinya, uKhuphe sewaqala inhlanganiso
yokukhankasela ukutholisa abantu ukwelatshwa lokuthola usizo masinya
ekwelatshweni umkhuhlane wemvukuzane nomanje ukusilela kwemali kusenza iqhule kancane.

UKhuphe uthi wathola ukwelatshwa masinya njalo yena yayihlasele ibele kodwa walandela konke odokotela abathi akwenze welatshwa wasila.
Uthe imvukuza isivamile njalo isihlupha ukwedlula umkhuhlane wegculaza
njalo imvukuzane iyelapheka.

Ukhuthaze uhulumende ukuba aqale ukuhlela ukuba zonke izibhedlela
eZimbabwe zibelemitshina labodokotela lemithi yokwelapha umkhuhlane
wemvukuzane kuqala emakilinika kusiya ezibhedlela ezinkulu zelizwe.

UNkosazana Khuphe uthe ukwelapha imvukuzane kuyadula kakhulu ngakho
kuqakathekile ukuba ugatsha lwezempilakahle lutholise uzulo ukwelatshwa eduze ngoba inengi labantu alilamali njalo abantu abasebenzi.

Umkhuhlane wemvukuzane ulakho ukuhlasela inqe yisiphi isitho somzimba
njalo kudingeka ukuba umuntu ayehlolwa masinya ayelatshwe ingakachithekeli emzimbeni wonke.

Facebook Forum

XS
SM
MD
LG