Amapholisa kamanisipala weJohannesburg amathathula uLincoln Moloi, uNhlanhla Joseph Vilakazi loThozamile Mhlanga bamiswe phambi komthethwandaba kaMantshi uJohn Baloyi elokitshini leRoodepoort ngolweSihlanu besetheswa icala lokubulala, ukutshaya lokuzama ukufihla ubufakazi becala.
Umtshutshisi utshele uMantshi ukuthi mhlaka 17 Mabasa ngomnyaka ophelileyo abathathu laba bathola uNare ehlezi emoteni yakhe bamdubula bambulala qede lapho bafihla ubufakkazi, basebesithi bona bebexotshana lemota etshontshiweyo.
Abathathu laba bakhululwe ngemva kokubbhadala imali yebail kanti icala labo selizathonisiswa emthethwandaba we High Court eJohannesburg.
Inhlanganiso yabahleli bezindaba kweleSouth Africa i South African National Editors Forum, ithi lesi yisifundo sokuthi intathelizindaba zilelungelo lokwenza umsebenzi wazo zingenqatshelwa muntu loba ukwethuselwa.
Intathelizindaba yeZimbabwe kweleSouth Africa uMxolisi Ncube laye wemukela ngezandla zombili ukubotshwa kwamapholisala.
"Nxa amapholisa ezabulala intathelizindaba isemsebenzini wayo, ngoba kusenza sicine sesicabangela ukuthi mhlawumbe ubulawele umsebenzi wakhe lowu ngoba ubengumuntu ovumbulula izinto ezenziwa ngudlu. Kumele ukuthi laba bantu ababanjiweyo bajeziswe ngendlela ebuhlungu ezavikela ukuthi into ezinjengaleyi ziqhubeke zisenzakala. Ngibuhlungu kakhulu ikakhulu nxa sekutholakala ukuthi udaka lolu akade elugcotshwa kuthiwa ubethwele isibhamu ludaka olungekhoyo."
La ngamazwi agcizelelwa ngenye intatheli yeZimbabwe, uMkhululi Chimoi.
UGodknows yena njengomuntu owaziwayo ube lenhlanhla enkulu ukubana udaba lwakhe lulandelelwe.
"Ngiyagqugquzela ngiyachallenger njalo onozindaba ukubana bathathe lesi isinyathelo ukubana belandelele amacala wonke okubulawa kwabantu kuma police station wonke across ilizwe."
UNare wapika iminyaka elitshumi kwele South Africa ngecala lokutshontsha ehlomile. Kuthe ekuphumeni kwakhe ejele waqala ukusebenzisana lenhlanganiso zezindaba ezitshiyeneyo ukulonda izindaba eziveza inhlobonhlobo yonke yobugangi.
Nguye owaveza obala imisebenzi yabomagumaguma ababetshaya, ukubulala lokubamba iganyavu abeZimbabwe nxa bechapha umfula uLimpopo besiza kweleSouth Africa.
Wangena njalo lasemigodini edingisisa ukubulalana kwabotsheketsha kwele South Africa. Ngokwenzanjalo wacina esebenza lenhlanganiso zezindaba ezigoqela iBBC, SABC, ENCA, New York Times lezinye.