amalinks wokungena

Breaking News

Kubotshwa Abantu Abavote Kabili Kukhetho Olusanda Kenziwa eSouth Africa


Kubalwa amavoti eCapa kwele South Africa, May 8, 2019.
Kubalwa amavoti eCapa kwele South Africa, May 8, 2019.

Ikhomishini yezokhetho kwele South Africa ithi isibophe abantu abangaba ngamatshumi amabili Kwazulu Natal ngemva kokuba bevote kabili ekhethweni lwayizolo. Lokhu kulandela imbiko ethi bakhona abesule i inki ebifakwa njengophawu kwasebevotile baphinda bayavota.

Ikhomishini le ithi ngemva kokukhalaza kwamabandla abencintisa kulolukhetho ngokwesuleka lula kwe inki ebigcotshwa asebevotile, iqale ukuhlola incwadi ezilamagama abavote endaweni abangabhalisanga kuzo okuyikho okwenze kwabotshwa abangamatshumi amabili laba.

Isiphathamandla sekhomishini le, uSy Mamabolo, uthi okwamanje likhomishini isiphakathi kokudinga inkampani ezahlolisisa wonke amaphepha elamagama alabo abavotele endaweni abangabhalisanga kuzo, besekuhlolwa ukuthi abaphindanga bavota yini lakulezo ndawo abebebhalise kuzo.

“Ikhomishini okwamanje ayenelisi ukutsho ukuthi bangaki abantu abavote kabili. Lelinani lizatholakala sekusetshenziswe ubungcitshi bescience okuyikho esesiphakathi kwakho okwamanje.”

Ngokutsho komthetho obanjwe esephula imithetho yokhetho ulakho ukugwetshwa iminyaka elitshumi esejele.

Ubuqili lobu sebubangele ukwesabela ukuthi impumela yokhetho ezakwethulwa izabe ilokuqilibezela. Kodwake inengi. labeZimbabwe lithi kuhle ukuthi ikomishinile isiphakathi kokulandelela labo abebeqilibezela.

Udaba Esilethulelwe NguBenedict Nhlapho
please wait

No media source currently available

0:00 0:03:27 0:00

Unobhala jikele webandla le Zimbabwe Communist Party, uMnu. Ngqabutho Mabhena, uthi lobanje bekusola kakhulu ukuqilibezela ekhethweni, lokhu akufani lalokhu ababakubone kusenzeka eZimbabwe.

“Umahluko owenzakala phakathi kwe IEC yeSouth Africa leZimbabwe Electoral Commission, yikuthi amabandla angenele ukhetho lapha eSouth Africa, balethemba lokuthi i-IEC iyenelisa ukuthi ixazulule izinto abazisolayo.”

UMnu. Lebani Nkomazana yena uthi kuyaziwa eAfrica jikelele ukuthi ikomishini yezokhetho kwele South Africa yenza umsebenzi oncomekayo kakhulu.

Ingcitshi zezombusazwe zithi kuzadingeka lucwayisiswe ngokuphangisa loludaba ngoba kungenzeka lwenze impumela yokhetho ingemukeleki kwabanye. Kodwake ezinye ingcitshi zithi le yinto engalungiseka kungaphazamisi impumela yokhetho.

Kusenjalo kuqhubekela phambili ukubalwa kwamavoti kwele South Africa. Impumela yengxenye yamavoti wonke atholakeleyo itshengisa ukuthi ibandla leAfrican national Congress (ANC) likhokhela ngesilinganiso esedlula amatshumi amahlanu ekhulwini (56.6%), lilandelwa ngele Democratic Alliance nge 23.4% kuthi iEconomic Freedom Fighters ibengeyesithathu nge 9.3%.

Kukhangelelwe ukuthi impumela yokhetho lokhe yethulwe ngoMgqibelo.

XS
SM
MD
LG