amalinks wokungena

Breaking News

Kubotshwa Abanye Njalo Abasekeli beMDC Phezu Kokubulawa Kwepholisa


Okhuluma emele iMDC ekhokhelwa nguMnu Morgan Tsvangirai uveze ukuba besokubotshwe abantu abedlula amatshumi amathathu ngoLwesibili

Ibandla leMDC elikhokhelwa nguMnu Morgan Tsvangirai lithi amapholisa eHarare aqhubeke ebopha abasekeli balo ngoLwesibili abacatshangelwa ukuthi baphatheke ekubulaweni kwelinye ipholisa emzini weGlen View ngeSonto.

Ababotshwe ngoLwesibili laba bagoqela ukhansila kaWard 32 eGlen View uMnu Tungamirai Madzokere.

NgoMvulo kubotshwe abantu abalitshumi lanhlanu, njalo isikhulumeli salelibandla uMnu Douglas Mwonzora uveze ukuthi ngoLwesibili kubotshwe inani elifanayo.

Amapholisa athi uInspector Petros Mutedza ugongodwe ngabasekeli beMDC eze ehambe labanye bakhe ukuyachitha umhlangano weMDC obungaphandle komthetho.

Kodwa abeMDC bayakulandula lokhu. Bathi uMutedza engaba ebulewe ngabantu aqalane labo kwelinye ibhawa lapho atshayelwe khona.

Unobhala jikelele wabatsha kulelibandla uMnu Promise Mkhwanazi uveze ukuthi utshone ecatshile ngoLwesibili ngoba ethole imbiko yokuthi amapholisa ayamthungatha.

"Mina labanye bami sitshone sicatshile ngoba sizwa kuthiwa amapholisa ayasidinga. Kodwa thina njengebandla siyakulandula ukuba uMutedza wabulawa ngamalunga ethu," kubike uMkhwanazi.

Isikhulumeli samapholisa uSuperitendent Andrew Phiri uthe amapholisa aphakathi kokudingisisa ngaloludaba.

Lanxa uPhiri etshele iStudio 7 ngoMvulo ukubana bekulabantu ababotshiweyo ngaloludaba, ngoLwesibili uguqule inkulumo yakhe wathi akula ngitsho loyedwa osebotshiwe.

XS
SM
MD
LG