Kulamalunga eMDC ekhokhelwa nguMnu Welshman Ncube alitshumi lanhlanu abotshwe ngamapholisa eTsholotsho ngoMvulo ephakathi kokukhulumisana lozulu bedingela ibandla labo usekelo.
Abantu laba betheswa icala lokwephula umthetho wePublic Order and Security Act (POSA).
Ibandla leli lithi okudanisayo yikuthi ukubotshwa kwabasekeli balo lokhu kuza ngesikhathi ilizwe lisaphakathi kokuthakazelela ubizuse.
Amapholisa ahlezi esebenzisa umthetho wePOSA ukuhlukuluza amalunga eMDC lamanye amabandla. Kodwa kawusebenzisi lumthetho kwabeZanu PF.
Ababotshiweyo bagoqela umabhalane webandla leli eMatabeleland North, uMnu Robert Mgezelwa Ndlovu, okhansila beTsholotsho uNkosazana Rhoda Ncube, uMnumzana Abel Dube loMnumzana Petros Mahonondo.
IStudio 7 ayenelisanga ukukhuluma lamapholisa ngaloludaba. Isikhulumeli seMDC uMnu Nhlanhla Dube uthi bayasisola kakhulu isenzo samapholisa, okungumbiko ogcizelelwe yingcwethi kwezombusazwe uMnu Nkululeko Sibanda.
