Amapholisa entabazinduna abophe intathelizindaba ezine ngoLwesihlanu ezibalisa ezisebenzela iphephandaba leDaily News ezimbili ezithi uPindai Dube loOscar Nkala, uNqobani Ndlovu osebenzela iphephandaba leStandard loPamenus Tuso oyintathelizindaba ezimeleyo.
Abane laba bakhululwe ntambama ngemva kokuvalelwa okwamahola amane besethuselwa njalo bebuzisiswa ngomsebenzi wabo.
Omunye wentathelizindaba lezi ongathandanga ukuqanjwa utshele iStudio 7 ukuthi bahambe enkambeni yeNtabazinduna ukuyacwayisisa ngokuxotshwa umsebenzi kwelinye ipholisa uAssistant Inspector Tedious Chisango, yena oyetheswa icala lokusekela iMDC.
UChisangoo ubikwa etholakale elengoma zeMDC kumakhalekhukhwini wakhe, wasexotshwa. NgoLwesihlanu ubexotshwa enkambeni lapho abehlala khona kanye lemuli yakhe.
Intathelizindaba lezi zibotshelwe eNtabazinduna zasezihanjiswa enkambeni yeMbembesi andubana zekelwe sokungenele amagqwetha azo.
Ukubotshwa lokuhlukuluzwa kwentatheli kukhanya sokuyinsakavukela umchilo wesidwaba kulezinsuku.
Icele leMDC elikhokhelwa nguMnu Welshman Ncube lethule umbiko lisola lesi sehlakalo.
Umgcinisihlalo weMisa-Zimbabwe uMnu Njabuklo Ncube usole kakhulu amapholisa ngokubopha intatheli lezi, esithi okumangalisayo yikuthi zilamalayisensi okusebenza elizweni.
